بس کہ زیر خاک با آب طراوت راہ ہے

بس کہ زیر خاک با آب طراوت راہ ہے

ریشے سے ہر تخم کا دلو اندرون چاہ ہے

عکس گل ہاے سمن سے چشمہ ہاے باغ میں

فلس ماہی آئنہ پرواز داغ ماہ ہے

واں سے ہے تکلیف عرض بے دماغی ہاے دل

یاں صریر خامہ مجھ کو نالۂ جانکاہ ہے

حسن و رعنائی میں وہم صد سر و گردن ہے فرق

سرو کے قامت پہ گل یک دامن کوتاہ ہے

رشک ہے آسایش ارباب غفلت پر اسدؔ

پیچ تاب دل نصیب خاطر آگاہ ہے

اے اسدؔ مایوس مت ہو از در شاہ نجف

صاحب دل ہا وکیل حضرت اللہ ہے