بس کی ہیں بدمست بشکن بشکن مے خانہ ہم

بس کہ ہیں بدمست بشکن بشکن میخانہ ہم

موے شیشہ کو سمجھتے ہیں خط پیمانہ ہم

بس کہ ہریک موے زلف افشاں سے ہے تار شعاع

پنجۂ خرشید کو سمجھے ہیں دست شانہ ہم

ہے فروغ ماہ سے ہر موج اک تصویر چاک

سیل سے فرش کتاں کرتے ہیں تا ویرانہ ہم

مشق از خود رفتگی سے ہیں بہ گلزار خیال

آشنا تعبیر خواب سبزۂ بے گانہ ہم

فرط بے خوابی سے ہیں شب ہاے ہجر یار میں

جوں زبان شمع داغ گرمی افسانہ ہم

جانتے ہیں جوشش سوداے زلف یار میں

سنبل بالیدہ کو موے سر دیوانہ ہم

بس کہ وہ چشم و چراغ محفل اغیار ہے

چپکے چپکے جلتے ہیں جوں شمع خلوت خانہ ہم

شام غم میں سوز عشق آتش رخسار سے

پر فشان سوختن ہیں صورت پروانہ ہم

غم نہیں ہوتا ہے آزادوں کو بیش از یک نفس

برق سے کرتے ہیں روشن شمع ماتم خانہ ہم

محفلیں برہم کرے ہے گنجفہ باز خیال

ہیں ورق گردانی نیرنگ یک بت خانہ ہم

باوجود یک جہاں ہنگامہ پیدائی نہیں

ہیں چراغان شبستان دل پروانہ ہم

ضعف سے ہے نے قناعت سے یہ ترک جستجو

ہیں وبال تکیہ گاہ ہمت مردانہ ہم

دائم الحبس اس میں ہیں لاکھوں تمنائیں اسدؔ

جانتے ہیں سینۂ پرخوں کو زنداں خانہ ہم

رہتے ہیں افسردگی سے سخت بیدردانہ ہم

شعلہا نذر سمندر بلکہ آتش خانہ ہم

حسرت عرض تمنا یاں سے سمجھا چاہئے

دوجہاں حشر زبان خشک ہیں جوں شانہ ہم

کشتی عالم بہ طوفان تغافل دے کہ ہیں

عالم آب گداز جو ہر افسانہ ہم

وحشت بے ربطی پیچ و خم ہستی نہ پوچھ

ننگ بالیدن ہیں جوں ہوئے سر دیوانہ ہم