ہر رنگ سوز پردۂ یک ساز ہے مجھے

ہر رنگ سوز پردۂ یک ساز ہے مجھے

بال سمندر آئنۂ ناز ہے مجھے

طاؤس خاک حسن نظر باز ہے مجھے

ہر ذرہ چشمک نگہ ناز ہے مجھے

آغوش گل ہے آئنۂ ذرہ ذرہ خاک

عرض بہار جوہر پرواز ہے مجھے

ہے بوے گل غریب تسلی گہ وطن

ہر جزو آشیاں پر پرواز ہے مجھے

ہے جلوۂ خیال سویداے مردمک

جوں داغ شعلہ سر خط آغاز ہے مجھے

وحشت بہار نشہ و گل ساغر شراب

چشم پری شفق کدۂ راز ہے مجھے

فکر سخن بہانۂ پرواز خامشی

دود چراغ سرمۂ آواز ہے مجھے

ہے خامہ فیض بیعت بیدل بکف اسدؔ

یک نیستاں قلم رو اعجاز ہے مجھے