جنوں رسوائی وارستگی زنجیر بہتر ہے

جنوں رسوائی وارستگی زنجیر بہتر ہے

بقدر مصلحت دل بستگی تدبیر بہتر ہے

خوشا خود بینی و تدبیر غفلت نقد اندیشہ

بدین عجز اگر بدنامی تقدیر بہتر ہے

کمال حسن اگر موقوف انداز تغافل ہو

تکلف بر طرف تجھ سے تری تصویر بہتر ہے

دل آگاہ تسکیں خیز بیدردی نہ ہو یارب

نفس آئینہ دار آہ بے تاثیر بہتر ہے

خدایا چشم یا دل درد ہے افسون آگاہی

نگہ حیرت سواد خواب بے تعبیر بہتر ہے

درون جوہر آئینہ جوں برگ حنا خوں ہے

بتاں نقش خود آرائی حیا تحریر بہتر ہے

تمنا ہے اسدؔ قتل رقیب اور شکر کا سجدہ

دعاے دل بہ محراب خم شمشیر بہتر ہے