نہ ہو حسن تماشا دوست رسوا بے وفائی کا

نہ ہو حسن تماشا دوست رسوا بے وفائی کا

بہ مہر صد نظر ثابت ہے دعویٰ پارسائی کا

ہوس گستاخی آئینہ تکلیف نظر بازی

بہ جیب آرزو پنہاں ہے حاصل دل ربائی کا

نظر بازی طلسم وحشت آباد پرستاں ہے

رہا بے گانۂ تاثیر افسوں آشنائی کا

نہ پایا درد مند دوری یاران یک دل نے

سواد خط پیشانی سے نسخہ مومیائی کا

تمنائے زباں محو سپاس بے زبانی ہے

مٹا جس سے تقاضا شکوۂ بے دست و پائی کا

اسدؔ یہ عجز و بے سامانی فرعون توام ہے

جسے تو بندگی کہتا ہے دعوا ہے خدائی کا