تمام اجزائے عالم صید دام چشم گریاں ہے

تمام اجزاے عالم صید دام چشم گریاں ہے

طلسم شش جہت یک حلقۂ گرداب طوفاں ہے

نہیں ہے مردن صاحب دلاں جز کسب جمعیت

سویدا میں نفس مانند خط نقطے میں پنہاں ہے

غبار دشت وحشت سرمہ ساز انتظار آیا

کہ چشم آبلہ میں طول میل راہ مژگاں ہے

زبس دوش رم آہو پہ ہے محمل تمنا کا

جنون قیس سے بھی شوخی لیلیٰ نمایاں ہے

نقاب یار غفلت نگاہی اہل بینش کی

مژہ پوشیدنی ہا پردۂ تصویر عریاں ہے

اسدؔ بند قباے یار ہے فردوس کا غنچہ

اگر وا ہو تو دکھلادوں کہ یک عالم گلستاں ہے