ذوق خودداری خراب وحشت تسخیر ہے

ذوق خودداری خراب وحشت تسخیر ہے

آئنہ خانہ مری تمثال کو زنجیر ہے

ذرہ دے مجنوں کے کس کس داغ کو پرواز عرض

ہر بیاباں یک بیاباں حسرت تعمیر ہے

میکش مضموں کو حسن ربط خط کیا چاہیے

لغزش رفتار خامہ مستی تحریر ہے

خانمان جبریان غافل از معنی خراب

جب ہوے ہم بے گنہ رحمت کی کیا تقصیر ہے

چاہے گر جنت جز آدم وارث آدم نہیں

شوخی ایمان زاہد سستی تدبیر ہے

شب دراز و آتش دل تیز یعنی مثل شمع

مہ ز سر تا ناخن پا رزق یک شگبیر ہے

آب ہوجاتے ہیں ننگ ہمت باطل سے مرد

اشک پیدا کر اسدؔ گر آہ بے تاثیر ہے