'sabā' ham ne to hargiz kuchh na dekhā jazb-e-ulfat meñ

ġhalat ye baat kahte haiñ ki dil ko raah hai dil se

'saba' hum ne to hargiz kuchh na dekha jazb-e-ulfat mein

ghalat ye baat kahte hain ki dil ko rah hai dil se

nāseh nasīhateñ ye kahāñ yaad rahtī haiñ

hazrat abhī kisī se tabī.at lagī nahīñ

naseh nasihaten ye kahan yaad rahti hain

hazrat abhi kisi se tabiat lagi nahin

bhaTkā phire hai majnūñ lailā ke qāfile meñ

ye pūchhtā ki yaaro mahmil kidhar gayā hai

bhaTka phire hai majnun laila ke qafile mein

ye puchhta ki yaro mahmil kidhar gaya hai

nahīñ ma.alūm ai yaaro 'sabā' ke dil meñ kyā aayā

abhī jo baiThe baiThe vo yakāyak aah kar uTThā

nahin malum ai yaro 'saba' ke dil mein kya aaya

abhi jo baiThe baiThe wo yakayak aah kar uTTha

kyā tū ne kuchh 'sabā' se ai tund-ḳhū kahā hai

rotā huā idhar se bā-chashm-e-tar gayā hai

kya tu ne kuchh 'saba' se ai tund-KHu kaha hai

rota hua idhar se ba-chashm-e-tar gaya hai