سردار جعفری کو 1968 میں جب دل کا دورہ پڑا تو اسپتال سے واپس آ کر ڈاکٹروں کے مشورے پر تین ماہ کے آرام کے دوران انھوں نے اپنے حافظے کا امتحان لینا شروع کر دیا ۔ جو شعر انھیں بچپن سے یاد تھے انھیں لکھتے گئے۔ حافظے کے اس امتحان سے ایک طویل فہرست تیار ہوگئ تب انھیں خیال آیا کہ اردو اشعار کی ایک لغت تیار کی جائے اور انھیں اتفاقیہ اس کام کے لئے دوسال کی فیلوشپ بھی مل گئ۔ انھوں نے "سرمایہ سخن" کے نام سے اردو شاعری کی ایک لغت تیار کی جس میں اکیس ہزار ایسے الفاظ منتخب کئے  جو اردو شاعری میں استعمال ہوئے ہیں اور انھیں حروف تہجی کی ترتیب سے درج کیا اور ان کی تشریح کے ساتھ ساتھ مثال کے طور پر اشعار بھی شامل کئے۔ یہ کام لغت نویسی اور تذکرے سے بالکل الگ تھا۔ سرمایہ سخن کا طویل دیباچہ بھی بہت دلچسپ ہے۔ اس میں مشہور اور مقبول استعاروں کا بھی ایک مختصر باب قائم کیا ہے جس کا عنوان ہے'  مقبول استعاروں کا خزانہ'۔ سردار جعفری کی یہ آخری ادبی یادگار ہے جو ان کی زندگی میں شائع ہو کر منظرعام پر نہیں آسکی۔ ان کا ارادہ اس کو کئ جلدوں میں لکھنے کا تھا۔ابھی دوسری جلد ہی لکھ رہے تھے، کافی کام ہو چکا تھا کہ موت نے اپنی آغوش میں لے لیا۔

پروین شاکر نے سولہ سال کی عمر سے شاعری شروع کر دی تھی. پہلے انھوں نے 'بینا' تخلص اپنایا تھا۔ کیا آپ جانتے ہیں کہ ان  کا نک نیم کیا تھا ؟ 
 ۔ پروین نے مشہور نقاد نظیر صریقی کے نام  اپنے ایک خط میں لکھا تھا 
" پارو میرا نک نیم ہے اور پارہ بھی۔ اس پارو کو آپ شہ پارہ یا مہ پارہ قسم کی چیز نہ سمجھئیے گا بلکہ یہاں پارہ اصلی سائنسی معنوں میں استعمال ہوا ہے۔ بچپن  میں اس قدر شریر ہوا کرتی تھی کہ میری سیمابی طبیعت کو دیکھتے ہوئے گھر والوں نے مجھے پارہ کہنا شروع کردیا۔ اب شرارت تو ختم ہوگئ لیکن نک نیم رہ گیا۔ کچھ 'پارہ'  کہتے ہیں کچھ ٰ  پارو کہتے ہیں۔
پروین شاکر کے انتقال کے بعد سن 1997میں یہ خطوط  "پروین شاکر کے خطوط نظیر صدیقی کے نام " سے کتابی شکل میں شائع  ہوئے۔ نظیر صدیقی نے اس کتاب کے پیش لفظ میں لکھا ہے  "پروین شاکر سے میرے تعلقات جنوری 1978سے شروع ہو کر کوئ سوا سال تک قائم رہے۔ اس دوران ان کے پچیس چھبیس خط آئے ہیں۔ یہ تعلقات جہاں تک چل سکے اچھے ہی چلے۔ لیکن جب ختم ہونے پر آئے تو اچانک ختم ہوگئے"۔

شاہ نصیر کا شمار اٹھارہویں صدی کے ممتاز شعرا میں ہوتا ہے۔ شاہ نصیر نے اپنی زندگی میں بے شمار شعر کہے مگر اپنا دیوان مرتب نہیں کیا۔ جو کلام کہتے اسے ایک جگہ رکھتے جاتے اور جب بہت سارا کلام جمع ہو جاتا تو تکیے کی طرح ایک لمبے سے تھیلے میں رکھ دیتے۔ گھر والوں کو تاکید کرتے کہ اس کی دیکھ بھال کرتے رہنا۔ شاہ نصیر کے بہت سے شاگرد ہوئے  جن کے کلام کی نہ صرف اصلاح کرتے، بلکہ بعض اوقات غزلیں بھی کہہ کر دیتے ، اور مشاعرے پڑھواتے۔ سنگلاخ زمینوں اور مشکل ردیف و قوافی میں شعر کہنا ان کا شوق تھا۔ شاعری کی وجہ سے ہی شاہ عالم کے دربار میں رسائی ہوئی۔ ان کا انتقال حیدراباد میں ہوا اور اس کے بعد ان کا دیوان ''چمنستان'' سخن کے نام سے شایع ہوا۔ یہ مشہور شعر انھیں سے منسوب ہے : 

خیال زلف دوتا میں نصیرؔ پیٹا کر
گیا ہے سانپ نکل تو لکیر پیٹا کر

جب فیض احمد فیض ساتویں کلاس میں تھے تب ان کی شاعری کی ابتدا ہوئ۔ ان کی پہلی کاوش ایک ہجو تھی۔ قصہ یوں ہے کہ فیض کو اسکول کے زمانے سے ہی ناول اور شاعری پڑھنے کا شوق ہو گیا تھا۔ ان کے بھائ طفیل احمد خاں جو ان سے  تین سال بڑے تھے، ان کے ایک دوست نے فیض سے پوچھا 'تم شاعری پڑھتے ہی ہو کہ لکھتے بھی ہو'۔  فیض نے کہا   'کبھی لکھی تو نہیں'۔ تب انھوں نے اپنے دوست چھجو رام کی ہجو لکھنے کی فرمائش کی۔ فیض نے اپنی سمجھ کے مطابق لکھ دی۔اگلے دن اسکول میں اس ہجو کی دھوم مچی ہوئ تھی۔ نرم دل فیض کو بہت ندامت ہوئ کہ میری وجہ سے چھجو رام کی دل آزاری ہوئ ہوگی۔ انھوں نے اسے ڈھوںڈ کر اس سے معافی مانگی۔ لیکن چھجو رام تو بہت خوش تھا کہ اس ہجو کی وجہ سے وہ اسکول میں مشہور ہو گیا۔ فیض نے پندرہ سال کی عمر میں اسکول میں طلبا کی شاعری کے مقابلے میں اپنی غزل پر اول انعام حاصل کیا تھا۔ اس مقابلے کے جج  مولوی میر حسن تھے جنھوں نے علامہ اقبال کو بھی پڑھایا تھا۔ یہی میر حسن علامہ اقبال اور فیض دونوں کے مشترکہ استاد تھے، جنھیں شمس العلما کا خطاب بھِی ملا۔

اکبر الہٰ بادی مشرقی اطوار اور تہذیب کے بہت بڑے حامی تھے۔ انھوں نے پوری شاعری میں انگریزی کلچر پر سخت طنز و تشنیع سے کام لیا۔ مگر خود اپنے صاحبزادے کو تعلیم کے لئے لندن بھیج دیا، جن کا نام عشرت حسین تھا۔ 
عشرت حسین کو روانہ کرتے وقت کافی عہد و پیمان بھی لئے کہ اپنی مشرقی روایت کو ہرگز نہ بھولنا۔ ایک بار عشرت کا خط آنے میں کافی دیر ہو گئی تو اکبرالہٰ بادی نے اپنا مشہور قطعہ لکھ بھیجا، جس کے دو شعر ملاحظہ ہوں 
عشرتیؔ گھر کی محبت کا مزا بھول گئے 
کھا کے لندن کی ہوا عہد وفا بھول گئے
پہنچے ہوٹل میں تو پھر عید کی پروا نہ رہی 
کیک کو چکھ کے سوئیوں کا مزا بھول گئے