دانش ور

’’آپ دنیا کے سب سے بڑے دانش ور ہیں۔‘‘

میں نے نوم چومسکی سے ہاتھ ملاکر کہا۔

’’آپ کا بے حد شکریہ۔‘‘ انھوں نے سر خم کیا۔

’’لیکن لسانیات سے متعلق آپ کی تھیوری بالکل غلط ہے۔‘‘

میں نے انھیں آگاہ کیا۔

وہ بھونچکے رہ گئے۔

’’اظہارِ رائے سے متعلق آپ کی رائے بھی ماننے کے لائق نہیں۔‘‘

میں نے تنقید کی۔

ان کے چہرے پر الجھن چپک گئی۔

’’آپ کے سیاسی نظریات بھی قابلِ اصلاح ہیں۔‘‘

میں نے انھیں سمجھایا۔

نوم چومسکی نے تھکے ہوئے لہجے میں کہا،

’’میں محض ایک طالبِ علم ہوں۔

دانش ور تو آپ ہوئے۔‘‘