گناہ

شراب بندی کی تحریک کا لیڈر بیمار ہو گیا۔ ڈاکٹر نے علاج سے مایوس ہو کر کہا۔’’تم شراب پیو۔‘‘

لیڈر نے کہا۔ ’’ڈاکٹر! میں اصول کی خلاف ورزی نہیں کرتا۔‘‘

ڈاکٹر نے جواب دیا۔ ’’تو زندگی سے ہاتھ دھو لو۔‘‘ ڈاکٹر چلا گیا۔ لیڈر کی بیوی نے شراب کی بوتل سے شراب انڈیل کر لیڈر کو دی۔ ایک سانس میں بغیر سوڈا ملائے وہ چڑھاگیا پھر اور مانگی اور ملی ، اور چڑھا گیا، پھر اور مانگی، پھر چڑھا گیا۔

بیوی کو غصہ آ گیا اس نے جھنجلا کر کہا۔ ’’اب نہیں دی جائے گی۔‘‘

’’کیوں؟‘‘ لیڈر نے پوچھا۔

’’بہت دیر ہوگئی۔‘‘

’’ہو جانے دو۔‘‘

’’ڈاکٹر کے سامنے اتنی پرہیزگاری کی کیا وجہ تھی؟‘‘

’’میں شراب بندی کا لیڈر ہوں شراب بندی میرا اصولِ زندگی ہے۔ ڈاکٹر سے شراب پینے کا اقرار گناہ تھا۔‘‘

’’اور یہ میرے ہاتھ سے پینا گناہ نہیں۔‘‘

’’نہیں، گناہ وہ ہے جس سے لوگ واقف ہو جائیں۔‘‘