راشن

’’میرے ٹی وی میں ایک کلو، کرکٹ میچ ڈال دو۔‘‘

میں نے پرچون فروش سے کہا۔

اس نے بوری سے کرکٹ میچ نکالے اور ٹی وی میں پلٹ دیے۔

میں پہلی تاریخ کو مہینے کا سودا لینے گیا تھا۔

’’صاحب جی! اور؟‘‘ دکان دار نے پوچھا۔

’’دس کلو سیاسی لفڑا، ڈیڑھ کلو ٹاک شوز،

دو کلو مارننگ شو، پانچ کلو ڈرامے،

پچھتر کارٹون، سو گرام کھانا پکانے کی ترکیبیں۔‘‘

دکان دار نے ریک سے ایک کتاب اٹھائی۔

’’صاحب جی! مہینے کے سودے پر ایک کتاب مفت۔‘‘

’’خبر دار!‘‘ میں چِلّایا،

’’کیوں میری حسین صبحوں اور رنگین شاموں کو خراب کرنا چاہتے ہو۔‘‘