غالب اور ہم

ہوں گرمی نشاط تصور سے نغمہ سنج

میں عندلیب گلشن ناآفریدہ ہوں

عظیم شخصیتوں کی تین قسمی ہیں۔ کچھ لوگ توایسے ہوتے ہیں جو خود کوئی کارنمایاں انجا م نہیں دیتے لیکن جواپنی نسل اور اس کے توسط سے بعدکی نسلوں کے لئے موثرقوت ثابت ہوتے ہیں۔ ان لوگوں کے وجود سے دوسروں کے دل ودماغ میں تخلیق واکتسابات کاولولہ پیدا ہوتاہے یعنی ان شخصیتوں کی عظمت یہی ہے کہ وہ اپنے ہم عصروں کوکچھ کرکے یادگار چھوڑجانے کی ترغیب دیں اوران کے تخلیقی جذبہ کو بے ساختہ ابھاریں اور اپنے کوکچھ نہ کرسکنے کا کفارہ اداکریں۔

کچھ بڑے لوگ ایسے ہوتے ہیں جوخود اپنی جگہ ایک قوت ہوتے ہیں لیکن دوسروں کے لئے موثرنہیں ہوتے۔ اس کاسبب یاتو یہ ہوتاہے کہ ان روشن شخصیتوں سے جوشعاعیں پھوٹتی ہیں ان کا دائرہ اثرتنگ ہوتا ہے اور وہ ان شخصیتوں کے گردہالہ بن کر رہ جاتی ہیں۔ یاپھر اگریہ شعاعیں دورتک پہنچتی بھی ہیں تووہ اتنی تیز اور گرم ہوتی ہیں کہ دوسرے ان کی تاب نہیں لاسکتے اور اپنی خواہش اورکوشش کے باوجودان کی بجائے خود عظیم شخصیتوں کے اثرات اپنے اندرجذب نہیں کرپاتے۔

لیکن بڑے لوگوں کی ایک تیسری قسم بھی ہے۔ اس قسم کے لوگ بڑی چیدہ او ر موثر شخصیت کے مالک ہوتے ہیں۔ وہ خود تواپنی جگہ تخلیقی یا اختراعی توانائی رکھتے ہی ہیں لیکن ان کے اندریہ قوت بھی ہوتی ہے کہ وہ نہ صرف اپنے معاصرین کی قابلیتوں کونئے انداز سے متاثرکریں بلکہ نسلا بعد نسل ہر زمانہ میں ہونہار نوجوان ذہنوں میں اپنے یادگار کارناموں کے اثرات سے فکروبصیرت کونئی جلادیتے رہیں اوراختراع واکتسابات کے میدان میں نئے امکانات اورنئی سمتوں کا احساس پیدا کرتے رہیں۔ ان عظیم شخصیتوں کوہرعہدکا جدیدذہن اپنا ہمدم اورہم قدم پاتاہے اور ہر نوجوان صاحب فکر وتخیل کی طرف اپنے کوکھینچتامحسوس کرتا ہے۔ غالب اکابر کی اسی تیسری برادری میں سے ہیں اور اپناایک خاص مقام رکھتے ہیں۔

اکابرذوق ونظراورمشاہیر فکروفن کواپنے زمانہ سے اکثرکورذذقی اورقدرشناسی کا شکوہ رہاہے۔ سقراط سے لے کر آج تک جولوگ فکری اعتبار سے پیش رفت رہے ہیں ان کونہ صرف اپنے زمانہ کے لوگوں سے شکایت رہی ہے بلکہ ان میں ایسوں کی تعداد کم نہیں جو ستائے گئے ہیں اورجن کو اپنی تخیل کی بدولت جان کی قربانی دینا پڑی ہے۔ انیسویں صدی کے رومانی دورمیں ورڈسورتھ جیسا مطمئن قلب ودماغ رکھنے والا اپنے عہد کی مادیت اوربڑھتی ہوئی زرپرستی کا روناروگیا ہے۔ اس کے خیال میں سوداگرانہ ذہنیت اورتاجرانہ لین دین نے ہماری قوتوں کوضائع کردیاہے اورہم کو اس قابل نہیں رکھاہے کہ ہم ان برکتوں کومحسوس کرسکیں جو قدرت نے ہمارے لئے مہیا کی ہیں۔ دوسری رومانی نسل کامشہور انگریزی شاعرشیلی اپنے زمانے سے بہت ا ٓگے تھا۔ یہی نہیں بلکہ موجودہ موعودہ الفیہ مسعود کی تمام برکتیں اپنے ہی زمانہ میں دیکھ لیناچاہتا تھا۔ وہ اپنے عہد سے اس قدر برگشتہ اور متنفر ہوا کہ خودکوجلاوطن کرلیا اوراطالیہ میں رہا اور وہیں شبابمیں مرااورجب تک وہ زندہ رہا اس کا وطن اس کوطعن ولعنت کا نشانہ بنائے رہا۔ شیلی فراغت آزادی اورمحبت کا پیغمبرتھا۔

غالب کوبھی زمانہ اور اورابنائے زمانہ سے شکایت رہی جیسا کہ ان کے خطوط اور بعض اردو اورفارسی اشعار سے مترشح ہوتاہے۔ عام خیال یہ تھا کہ ان کا اردوکلام فکر کے اعتبار سے پیچیدہ اور اسلوب کے لحاظ سے غیرمانوس اور دوراز کا رہوتاہے۔ خودغالب کواحسا س تھا کہ ان کاکلام مشکل ہے اور وہ ’’گویم مشکل وگرنہ گویم مشکل‘‘ کی کشمکش میں مبتلاتھے۔ اسی لئے مولوی فضل حق خیرآبادی جیسے مخلصوں کے مشورہ اورتعاون سے وہ انتخاب مرتب ہوا جس کو’’نسخہ حمیدیہ‘‘ کی اشاعت سے پہلے ’’دیوان غالب‘‘ سمجھاجاتا رہا۔ یہ اپنے عہد کے بہتر معزز اور ممتاز لوگ تھے اورغالب کی صلاحیتوں کے معترف تھے۔ اور صدق دل سے چاہتے کہ غالب ک فکری اجتہادات اور اسلوبی اختراعات کم سے کم ارباب علم وفن میں کثیر سے کثیرتعداد کے لئے قابل فہم ہوں اوروہ ان سے فیض حاصل کرسکیں۔

مگرایک گروہ اسے لوگوں کابھی تھا جو باکمال ہستیوں سے صرف اس لئے حسد اور پرخاش رکھتے ہیں کہ خوداپنے اندر کوئی کمال پیدا نہ کرسکے اورجواچھوں کوبرا کہتے ہیں کیونکہ وہ ایساکرنے پر اسی طرح فطرتا مجبور ہیں جس طرح بچھو ڈنک مارنے پر۔ یہ لوگ غالب کی شاعری کو سرتاسرمہمل بتاتے تھے۔ ان کی نیتوں میں فتورتھا۔ اور وہ غالب سے للہی عناد رکھتے تھے۔ یہ گروہ غالب کی مخالفت میں اپنی آواز مشتہر بھی کرتا تھا۔ ایک ہم عصر کا یہ شعر غالب کے اکثر تذکرہ نگاروں نے مثال کے طور پر درج کیاہے۔

کلام میر سمجھے اور زبان میرزا سمجھے

مگران کا کہا یہ آپ سمجھیں یا خدا سمجھے

اورغالب کے ذہن میں یہی لوگ تھے جب انہوں نے یہ اشعارکہے تھے۔

نہ ستائش کی تمنا نہ صلے کی پروا

گر نہیں ہیں میرے اشعار میں معنی نہ سہی

حسد سزائے کمال سخن ہے کیا کیجئے

ستم بہائے متاع ہنر ہے کیا کہیئے

غال سوختہ جاں راچہ بگفتار آری

بہ دیارے کہ نہ دانند نظیری زقتیل

آخری دوشعر توذاتی شکایت کے حدود سے نکل کرکلیات بن کرتاریخ تہذیب کے قدیم ترین ادوا ر سے لے کرہمارے اپنے دورتک درست ثابت ہورہے ہیں۔ آج بھی ایسے لوگ اکثریت میں ہیں جو غالب اورنظیری اورقتیل اورواقف کے درمیان کوئی امتیاز نہیں کرتے اور جوغالب جیسی باکمال شخضیتوں کے لئے اپنے دلوں میں حسدکے سوا کوئی دوسرا جذبہ نہیں پاتے۔

غالب اپنے حاسدوں میں کسی کواپنا ’’ہم فن‘‘ اور ’’ہم نوا‘‘ نہیں سمجھے تھے اوربظاہر ان کے ایرادوتنقیص کی طرف سے بے پروانظرآتے تھے لیکن ان کے اردوکلام پراعتراضات کی بوچھاڑنے ان کواتنا تنگ کیاکہ انہوں نے ’’سوادریختہ‘‘ کے ایک دوجزو یعنی ’’مجموعہ اردو‘‘ کواپنا ’’بے رنگ‘‘ کلام کہہ دیا اوراپنی فارسی شاعری کونقش ہائے رنگ رنگ کا عنوان دے کر اپنے لئے باعث فخر قرار دیا۔ غالب اپنی فارسی شاعری پرجتناناز کریں بجا ہے لیکن فارسی ہمارے ملک کی زبان نہیں تھی اورخواص میں بھی فارسی کا ذوق مٹ رہاتھا۔ آج برصغیر پاک وہند میں غالب کا نام ان کی اردو شاعری اور اردوخطوط کی بدولت زندہ اور مشہور ہے۔

غالب نے بڑا پرآشوب زمانہ پایاتھا اور اس پرانہوں نے اپنے اردوخطوط میں جی کھول کر غم اور غصہ کااظہار کیاہے۔ یہاں تک توبات سمجھ میں آتی ہے۔ واقعی بڑی آزمائش اورمصیبت کا زمانہ تھا جس کو جہاں تک غالب کوستے کم تھا۔ غالب نے اس شعر میں جس احساس محرومی کا اظہارکیاہے وہ بہت صحیح ہے۔

نہ مرا دولت دنیا نہ مرا اجر جمیل

نہ چونمرود توانا نہ شکیبا چوغلیل

اس شعر میں اپنی حالت کی جوتصویرپیش کی ہے وہ درست ہے۔ البتہ ہم اتنا کہیں گے کہ غالب کوخلیل کی شکیبائی میسرنہ ہوسکی۔ یہ ان کے اپنے ذاتی مزاج کا قصورتھا۔ آخرمیر کو بھی توبڑا ہولناک زمانہ ملاتھا۔ مگر باوجود اس کے کہ زمانہ اورابنائے زمانہ پرکچھ ہجویں کہی ہیں جو جلی کٹی یا سب وشتم کا انداز لئے ہوئے ہیں۔ میر اپنے کردارکی سالمیت اوراپنی شخصیت کے وقار کو قائم رکھتے ہیں۔ غالب اپنے بلند آہنگ اورجلیل القدرپیغام کے باوجودنجی زندگ کی آزمائشوں کا ذکر کرتے ہوئے ضبط وتحمل وقاروتمکنت کوبرقرار نہیں رکھ پائے۔ یہ ان کی ذاتی کمزوری تھی۔

بہرحال غالب کوزمانہ کی گردش اور اس کی ناسازگاری کاجودکھ تھا وہ بشریت کا تقاضاتھا۔ اس پر ہم کوبازپرس کا کوئی حق نہیں۔ لیکن غالب کی اس شکایت کوہم مشکل سے تسلیم کرسکتے ہیں کہ ان کے زمانہ میں ان کی قدرنہیں ہوئی۔ اہل کمال کی اہل کمال ہی قدرکرسکتے ہیں۔ خواص کی قابلیت کوخواص ہی پرکھ سکتے ہیں۔ تاریخ کے کسی دور میں بھی اکثریت جوہرقابل کے حق میں ناشناس ہی رہی ہے۔ پھرجب ہم یہ دیکھتے ہیں کہ غالب کس قسم کے خارج المرکز جوہرقابل تھے تو عوام تو عوام تھے اگرخواص بھی ان کی قدر کا اندازہ کرنے سے قاصر رہ جاتے تو ان کو معاف کردیتے۔

لیکن حقیقت یہ ہے کہ ان خود ان کے زمانے میں غالب کی جتنی قدرومنزلت رہی وہ بہت کم لوگوں کونصیب ہوتی ہے۔ خواص کے ہرحلقہ میں ان کی محبت اور عزت کرتے تھے اور ان کے ساتھ خلوص ونیاز کا تعلق رکھتے تھے۔ ارباب علم وفضیلت میں مفتی صدرالدین آزردہ، مولانا امام بخش صہبائی، مولانا فضل حق خیرآبادی جیسی برگزیدہ ہستیاں غالب کے غیرمعمولی ذہن اوران کی اجتہادی قابلیت کے معترف تھیں اوران کے ساتھ شفقت اورمحبت برتتی تھیں۔ شیخ نصیرالدین عرف کالے خاں جیسے مانے ہوئے بزرگان رشد وہدایت کے ساھت غالب کے تعلقات بے تکلفانہ تھے۔ نواب ضیاء الدین خاں رخشان ونیرنواب الہی بخش خان معروف، نواب علاء الدین خاں علائی جیسے امیر اور رئیس غالب کے معتقدتھے۔ شاعری کا کھرا ذوق رکھنے والے غالب کے مرید تھے۔ جوان کے باقاعدہ شاگر دنہیں تھے۔ وہ بھی غالب کی صحبت کواپنے لئے فخر سمجھتے تھے اور شعوری طورپران سے اثرقبول کررہے تھے۔ نواب مصطفی خان شیفتہ و حسرتی رئیس جہاں گیرآباد جومومن کے شاگردتھے اورغلام علی وحشت ایسے ہی لوگوں میں سے تھے۔ غالب کے ہم چشموں میں حکیم موہن خان موہن کا نام سب سے زیادہ اہم ہے۔ دونوں ایک دوسرے کے مزاج داں تھے او رسچے دل سے ایک دوسرے کی قدر کرتے تھے۔

اب ان لوگوں کی طرف آئیے جوغالب سے تلمذرکھتے تھے۔ غالب کوشاگردبنانے کاکوئی ارما ن نہیں تھا اوروہ شاگردوں کی کثرت کوفخر کی بات نہیں سمجھتے تھے لیکن جوکوئی ان کی شاگردی کا آرزو مندہوتاتھا یا اپنے کلام پر اصلاح چاہتا تھا اس کووہ کبھی مایوس نہیں کرتے تھے بلکہ نہایت فراخ دلی کے ساتھ اس کے اشعار پر اصلاح کردیتے تھے اورہمیشہ اس کے ساتھ خلوص اورشفقت کا برتاؤ کرتے تھے۔ جن رئیسوں اورامیروں کی طر ف اشارہ کیاگیاہے ان میں بیشترغالب کے شاگرد تھے اوربعض ایسے تھے جوغالب کو اپناکلام دکھاتے یا سناتے تھے اوران کے افکارو آرا سے بہ قدر طرف واستعداد مستقل اثرقبول کرکے اپنی شاعری میں جذب کرلیتے تھے۔

غالب کی بے نیاز طبیعت کے باوجود ان کے شاگردوں کی تعداد کثیر تھی اور سارے ملک میں پھیلی ہوئی تھی دہلی اورنواح دہلی میں ان کے جو شاگردان سے زیادہ قریب تھے ان میں نواب ضیاء الدین خان، نیردرخشاں اورنواب علاء الدین خان علائی کا ذکرکیاجاچکاہے۔ ان کے علاوہ الطاف حسین حالی مرزازین العابدین خاں عارف (جوغالب کی سالی کے بیٹے تھے اورجن کو غالب نے اپنا لڑکا بنالیاتھا) میرمہدی مجروح اورمنشی ہرگوپال تفتہ غالب کے بڑے محبوب شاگردتھے۔ اسی زمانہ میں ایک اورشاعر ہوا ہے جوعلی گڑھ کا رہنے والاتھا۔ خاندانی کائستھ تھا۔ بنواری لال نام تھا۔ شعلہ تخلص کرتا تھا۔ وکالت ذریعہ معاش تھی۔ حسرت موہانی نے شعلہ کوغالب کا شاگرد بتایاہے۔ اور ’’اردوئے معلی‘‘ کی کسی جلد میں ان کی غزلوں کا مختصر انتخاب بھی شائع کردیاہے۔ بنارس یونیورسٹی کے ڈاکٹرمہیش پرشاد نے غالب کے خطوط کا جونسخہ شائع کیاہے اس کے مقدمہ پر صاف طورکہا ہے کہ شعلہ غالب کے شاگردنہیں تھے۔ حقیقت یہ ہے کہ شعلہ منشی ہرگوپال تفتہ کے شاگرد تھے جوخودغالب کے عزیز ترین تلامذہ میں تھے۔ اس طرح شعلہ کا نسب شاعری غالب ہی سے ملتا ہے۔ جب ہم شیفتہ، حالی، مجروح کے رنگ سخن کوسامنے رکھتے ہوئے شعلہ کے کلام پرنظر ڈالتے ہیں تو وہ ہم کوذوق یا اسیرلکھنوی کے دبستان کے شاعرنہیں معلوم ہوتے بلکہ محسوس ہوتا ہے کہ زبان وبیان کے رکھ رکھاؤ کے ساتھ غالب کے کلام کے صالح عناصر سے وہ اپنی شاعری کے مزاج کی تربیت کرتے رہے ہیں۔

یہ بات ملحوظ رکھنے کے قابل ہے کہ غالب کے تلامذہ اورمعتقدین کی تعداد کتنی ہی کیوں نہ رہی ہو اورانہوں نے کتنوں ہی کے اشعار پر اصلاح کیوں نہ کی ہو وہ یہ نہیں چاہتے تھے کہ کوئی ان کی پیچیدہ طرزفکر اور ان کے معمول سے ہٹے ہوئے اسلوب زبان وبیان کوجوں کا توں اختیارکرے اور جب وہ کسی کے کلام پر اصلاح دیتے تھے تو صاحب کلام کے مبلغ فکر اور معیاراظہار وابلاغ کو ہمیشہ مدنظر رکھتے تھے۔ غالب کو احساس تھا کہ انہوں نے اپنے لئے جو بدیع المثال انداز فکر اور رنگ سخن منتخب کیا اس کو وہ خود تونباہ لے گئے لیکن اگردوسروں نے اس سے مستفید ہونے کے بجائے اس کی اندھی تقلید کی تو اردوشاعری کے بدراہ ہوجانے کا خطرہ ہے۔ یہ امربھی قابل توجہ ہے کہ خودغالب کے زمانہ میں کسی نے ان کی تقلید نہیں کی۔ ان سے فیض یاب جتنے بھی ہوئے ہوں ان کی طرز اڑانے کی کوشش توبیسویں صدی کی پہلی چوتھائی کے اندرہوئی اوربعض ناعاقبت اندیش شاعروں کے سرمیں غالب بننے کا سوداسمایارہا لیکن یہ شعرا خود تو کوئی نمود حاصل نہ کرسکے البتہ غالب کی شاعری کوبدنام کرگئے۔ اکثرغزلیں اخبار وجرائد میں نظر سے گزرتی رہی ہیں جن کی نمایاں خصوصیات فارسی الفاظ وتراکیب اورغیر ضروری تشبیہات واستعارات کی بھرمار اورمعنی کی قلت یا معنی کااختلال ہے۔ تقریبا پچاس سال پہلے کچھ اشعارپڑھے یا سننے میں آتے تھے۔ دوتین اشعارنمونہ کے طورپرحاضر ہیں۔

سرشوریدہ پائے دست پیما شام ہجراں تھا

کبھی گھرتھا بیایاں میں کبھی گھر میں بیاباں تھا

ادادان فسوں کاری خماریں چشم قاتل ہے

زنخداں مکتب تعلیم سحر چاہ بابل سے

یہ میرٹھ کے ایک مشہور شاعر کے اشعار ہیں جواپنے زمانہ میں استادمانے جاتے تھے اور شاگردں کی خاصی تعداد رکھتے تھے۔

ایک اور شعر یاد آ گیا۔

پھر انا للہی بنے آماجگاہ اعتبار

دار کو پھر حسرت نظارہ منصور ہے

یہ بدایوں کے ایک صاحب کا شعر ہے جن کی غزلیں اخباروں میں چھپا کرتی تھیں۔

غالب کی طرف جولوگ مائل ہوئے اوران سے اصلاح لی یا ان سے اثرقبول کرتے رہے وہ بڑی سلیم اور صالح طبیعت اوربڑے مستقیم اورمحکم کردار کے لوگ تھے۔ ان میں تین یعنی شیفتہ حالی اور سرسید کا ذکرخصوصیت کے ساتھ کرنا ہے اس لئے کہ غالب کی فکر اوران کے لب اظہار کا جواثرہماری نظم ونثر میں اندرونی تموج کے طورپر اب تک جاری ہے وہ ایک سلسلہ ہے جس کی ابتدائی کڑیاں یہی تینوں شخصیتیں ہیں۔

شیفتہ مومن کے شاگردتھے۔ لیکن غالب سے ان کو دلی انس تھا اورہرحال میں وہ غالب کے رفیق اور ہمدرد تھے۔ مومن کے شاگرد رہتے ہوئے بھی وہ غالب سے مشورہ لیتے تھے اورمومن کے بعدتو وہ اپنا کلام باقاعدہ غالب کودکھانے لگے تھے۔ شیفتہ کی غزل سرائی میں نہ مومن کی چیستاں نگاری ہے اور نہ غالب کی فکری ژرف۔ ان کے بیان میں نہ مومن کی تعقید ہے نہ ان کا لفظی تضاد یا استحالہ اورنہ غالب کے اسلوب کی غرابت کی حد تک بڑھی ہوئی جدت۔ مگران کے اردو اور فارسی کلام کے مطالعہ سے پتہ چلتا ہے کہ دونوں اساتذہ کا جوہران کے اپنے انفرادی فکری وفنی شعور کے ساتھ مل کر کام کررہاہے۔ ان کے اشعار میں ایک پرتامل سنجیدگی ہوتی ہے اوران کی زبان اورطرز اظہار میں ایک شائستگی اورلطافت کا احساس ہوتاہے۔ یہ وہ زمانہ تھا جب اردوغزل کے مزاج میں فسادپیدا ہوچلا تھا۔ شاہ نصیراورذوق دہلی میں ناسخ اورانہیں سے مقابلہ اورمسابقہ کی دھن میں آتش اوران دونوں کے تلامذہ شاعری کو زبان اور صنائع بدایع کی بازی گری بنائے ہوئے تھے۔ ادھرامیرمینائی اوراسیرلکھنوی کے دوسرے شاگردوں اورداغ دہلوی اور ذوق کے پیروں کا عنفوان شبا ب تھا اوران کی آوازمیں لوگوں کومتوجہ کرنے لگی تھیں۔ ان کی سستی اورادنی قسم کی لذت پرستی اورخوش باشی کواردوشاعری میں قبول عام حاصل ہوناشروع ہوگیاتھا۔ غزل میں ابتذال کے آثار رونما ہوچلے تھے۔ ایسے میں شیفتہ حالی اورغالب اورمومن کے شاگردغزل کی فطری شرافت اور پاکیزگی اور اس میں احساس وفکر کی متانت کو قائم رکھ کرآنے والی نسل کے لئے مثال چھوڑ گئے۔ یہ معمولی اکتساب نہیں ہے۔ شیفتہ ایک اوراعتبار سے بھی تاریخی قدررکھتے ہیں۔ اردوشاعری کے جتنے اہم تذکرے ہیں لکھے جاچکے تھے جن میں بیشتر فارسی زبان میں ہیں۔ تذکرہ نگاری کا دورختم ہورہاتھا۔ اسی زمانہ میں شیفتہ کا تذکرہ ’’گلشن بے خار‘‘ سامنے آتاہے جوتنقیدی درک کا احساس دلاتاہے۔ ہیئت اورترتیب کے لحاظ سے یہ بھی تذکرہ ہے لیکن ہمیں اس میں کچھ یادگار جملے اورفقرے مل جاتے ہیں جوزیرنظر شاعر کے کلام کی انفرادی خصوصیات کی طرف اشارہ کرتے ہیں۔ شیفتہ کی راتیں متوازن اور معقول ہوتی ہیں اور ان کا لب ولہجہ دقیع ہوتاہے۔ یہ پرتامل سنجیدگی اوریہ مفکرانہ شائستگی کا شیفتہ کااپنا مزاج ہے لیکن اس کی تہذیب میں مومن کی شاگردی اورغالب کی صحبت کوبھی بہت بڑا دخل ہے۔ بعد کی نسل نے شیفتہ کی ناقدانہ بصیرت سے بھی بہت کچھ پایاہے۔

حالی غالب کے نامورشاگرد تھے اورشیفتہ کے رفیق وجلیس۔ دونوں سے ان کوقرب اقرب حاصل تھا۔ حالی کئی حیثیتوں سے اردوادب کی تاریخ میں نیاموڑ ہیں۔ حالی کی یاد آتے ہی ہمارا ذہن بے ساختہ اردوشاعری کی اس صنف کی طرف منتقل ہوجاتاہے جواصطلاح میں نظم یا نظم جدید کہلاتی ہے اور جس کے بانی حالی اور آزاد دونوں ہیں مگرجو مقبول ومروج حالی ہی کے اکتسابات کی بدولت ہوئی۔ یاپھر ہمارا خیال اس حالی کی طرف جاتاہے جس نے اردومیں جدید طرز کی تنقید اور مغربی انداز کی سوانح نگاری کی نہ صرف بنیادڈالی بلکہ اس کوکچھ ایسا مقبول بنایاکہ آج تک ہم تنقید اور سوانح میں انہیں کے نکالے ہوئے راستہ پرمنزلیں طے کرتے ہوئے آگے بڑھتے چلے آئے ہیں۔ ’’مقدمہ شعروشاعری’‘ اردو میں پہلی ادبی دستاویز ہے جس میں شعر کی ماہیت اورغایت، شاعری کے اصول واوضاع اوراسکے اصناف واسالیب پرعالمانہ بحث کی گئ ہے اوران کے محاسن کا سنجیدگی اورشائستگی کے ساتھ جائزہ لیتے ہوئے بے اعتدالیوں اور بے عنوانیوں کے خطرات سے ہم کوآگاہ کیاگیاہے۔ ’’حیات سعدی‘‘ اور’’یادگار غالب‘‘ پہلے اقدامات ہیں جن میں اردومیں جدید سیرت نگاری، متوازن اورمتین سوانحی تنقید اور اکابر کے تخلیقی کارناموں پرجچے تلے اندازمیں انتقاد اور اشعار پرتجزیاتی اور تشریحی تبصرہ کا ایک نیا اورمستحکم معیارقائم ہوا حالی کا یہ ترکہ ہمارا بہت بڑا ادبی سرمایہ ہے جو تاحال ہمارے کام آرہاہے اور جس سے آئندہ نسلیں بھی کبھی بے نیاز نہیں ہوسکتیں۔ عام خیال یہ ہے کہ حالی اس نئے ماحول اوراس نئی فضا کی مخلوق تھے جومغربی اثرات کی وجہ سے ہماری تہذیب اورہمارے معاشرے کے ہرشعبہ میں پیدا ہوچلی تھی اور جس کوسرسید اور ان کے رفیقوں نے شعوری طورپرقبول کرکے بہت جلدعلی گڑھ تحریک کی منظم صورت دی۔ یہ ایک تاریخی واقعہ ہے جس سے کوئی انکار نہیں کرسکتا۔ لیکن بات اتنی ہی نہیں ہے۔ ذراسوچئے اسی فضا کے اوائل میں مصحفی، جرات اور انشاگزرچکے تھے۔ ناسخ، آتش اور اسیر کو بھی یہی فضا نصیب ہوئی۔ ذوق بھی کسی دوسری فضا کے پروردہ نہیں تھے۔ امیراورداغ اسی فضا میں مانع ہوئے۔ آخر ان لوگوں کی شاعری میں نئی فضا کے آثار کیوں نہیں ملتے۔ ان لوگوں نے راہ فرارکیوں اختیار کی اور شاعری کی تفریح یا سستی قسم ک عیش کوی اور لذت پرستی بناکر اس میں پناہ کیو ں لی۔ یہ بہت اہم سوال ہے اور اس کا جواب صرف یہ ہے کہ نئے اسباب وموثرات اور میلانات وعوامل کوسمجھنے اور ان سے صحیح اثر قبول کرنے کے لئے بڑے حق شناس اور صالح ذہن اورہوش وتمیزکی ضرورت ہے۔ غالب نے ایسا ہی ذہن اور ایسی ہی استعداد پائی تھی اوران کے جتنے شاگرد اور معتقد اورجتنے ان کی عظمت فکرکے ماننے والے تھے سب حق شناس اورمعقول پسند تھے۔

ذکر حالی کا تھا۔ ہم حالی کی نظموں اورنثری کارناموں میں کچھ ایسا محورہتے ہیں کہ ان کی ایک اوراہم حیثیت کی طرف دھیان ہی نہیں جاتا۔ ان کی یہ حیثیت سرسید کے حیطہ اثرمیں آنے سے بہت پہلے قائم اورمسلم ہوچکی تھی اور یہ ان کی اولین حیثیت ہے۔ وہ پنے عصر کے نہ صرف اچھے غزل گوتھے بلکہ غزل کی جوممتاز خصوصیات انہوں نے ’’مقدمہ شعروشاعری‘‘ میں گنائی ہیں ان سب کو اپنی غزلوں میں برتابھی ہے اورجن بے اعتدالیوں کو ہمارے ذہن نشین کرایاہے ان سے خود سختی کے ساتھ اجتناب کیاہے۔ ہم کہہ سکتے ہیں کہ حالی نے غزل کو ڈوبنے سے بچاکر اس کی آبرو اورحرمت کی حفاظت کی۔ حسرت موہانی کے بارے میں کہا جاتا ہے کہ انہوں نے غزل کا احیاکیاہے۔ بہت صحیح ہے۔ لیکن اس احیامیں شاید دشواری ہوتی اگر حالی اور شیفتہ اس کوزندہ اور توانا نہ چھوڑگئے ہوتے۔ حالی کے اشعار ان تمام عناصر اور خصوصیات سے معمورہوتے ہیں جوتغزل کی فطرت میں داخل ہیں اور وہ اعتدال کے ساتھ ایسے اشارے بھی ہوتے ہیں جوتامل انگیز ہوتے ہیں مگر جو ان کومعمہ نہیں ہونے دیتے۔ ان کے اشعار سراسر حال ہوتے ہیں۔ اس کا سبب یہ ہے کہ اول تو حالی کے مزاج میں سلامت روی تھی جوکبھی ان کا ساتھ نہیں چھوڑتی تھی۔ دوسرے ان کوغالب جیساصاحب ہوش ونظراستاد ملا جس کے ساتھ حالی کوپرخلوص ارادت تھی۔ اس نے ان کی تخلیقی بصیرت کو جلابخشی۔ ہم اس موقع پرحالی کے صرف چنداشعار کی طرف توجہ دلانا ضروری سمجھتے ہیں۔

پردے بہت سے وصل میں بھی درمیاں رہے

شکوے وہ سب سنا کئے اورمہرباں رہے

دریا کو اپنی موج کی طغیانیوں سے کام

کشتی کسی کی پار ہو یا درمیاں رہے

ہے جستجو کہ خوب سے ہے خوب ترکہاں

اب ٹھہرتی ہے دیکھئے جاکر نظرکہاں

اک عمرچاہئے کہ گوارا ہو نیش عشق

رکھی ہے آج لذت زحم جگرکہاں

بے قراری تھی سب امیدملاقات کے ساتھ

اب وہ گلی سی درازی شب ہجراں میں نہیں

سخت مشکل ہے شیوہ تسلیم

ہم بھی آخر کو جی چرانے لگے

کس سے پیمان وفا باندھ رہی ہے بلبل

کل نہ پہچان سکے گی گل تر کی صورت

گھٹ گئیں کچھ تلخیاں ایام کی

بڑھ گئی ہے یا شکیبائی بہت

اگرپہلے سے یہ معلوم نہ ہوکہ حالی کوغالب سے تلمذ حاصل تھا اور اس دور کے تمام مشاہیرسخن کوجمع کیاجائے اور غزلیات حالی کوسامنے رکھ کرپوچھا جائے کہ حالی کس کے شاگرد ہوسکتے ہیں تواہل ذوق وبصیرت بے تامل کہہ دیں گے کہ غالب کے شاگرد تھے یا غالب کا اثران کے کلام میں نمایاں ہے اورپہچانا جاسکتاہے۔

تیسری شخصیت یعنی سرسید کے بارے میں کچھ زیادہ کہنے کی ضرورت نہیں اس لئے کہ ان کی یاد میں اب تک دلوں میں جاگ رہی ہے۔ برصغیر کے مسلمانوں کومایوسی اورجمود کی مہلک فضا سے نکال کر سعی وعمل اورفلاح وترقی کے جس راستہ پر انہوں نے لگایا اس پر ہم آج تک گامزن ہیں اورتیزی کے ساتھ منزلیں طے کرتے ہوئے آگے بڑھ رہے ہیں۔ سرسید خوداپنے زمانہ میں طرح طرح کے لعن طعن کانشانہ بنے رہے۔ مردہ ماضی کوسینے سے لگائے رہنے والے گروہ نے جواکثریت میں تھا ان کورسوا اورخوار کرنے میں کون سا طریقہ تھا جس کواٹھارکھاہو۔ ان کوکیاکیا نہیں کہا گیا۔ کافر، دہریہ، کرسٹان، یہ تھے وہ القاب جن سے ان کو نوازاگیاتھا اورآج بھی سرسید کی عظمت کوماننے والوں کے ساتھ ایسوں کی کمی نہیں جوسرسید کے تاریخی کردار سے تجاہل برت کران کوانگریزوں کا پرستار اورتاج برطانیہ کا ہوادار سمجھتے ہیں۔ ہمارا مقصد سرسید سے بحث کرنا نہیں ہے لیکن ان کے نازک پرخطر عہداوران کے ماحول کو پیش نظر رکھنا ضروری ہے۔ سرسید اگرچہ کوئی بڑے عالم فاضل نہیں تھے لیکن وہ بڑے بیدارمغزانسان تھے اورجو بیدارمغز انسان ہوتاہے وہ تھوڑے سے تھوڑے علم کوجید سے جیدعالم کے مقابلہ میں زیادہ مقبول اور مفید طورپرکام میں لاسکتاہے۔ اس لئے کہ اس کے اندر علم سے زیادہ شعور ہوتاہے۔ سرسید کی علمی استعداد جتنی بھی رہی ہو ان کا خاندان علم وحکمت میں ایک مقام رکھتاتھا اور اس زمانہ میں علم وحکمت کے معنی مسلمان خاندانوں میں مذہبی علم وحکمت کے تھے کیونکہ اس زمانہ میں سب سے زیادہ بحران مسلمانوں کی قسمت میں تھا اوروہ آٹھ سوبرس پرانی تہذیب جوتاریخ میں ہندومسلم تہذیب کے نام سے یاد کی جاتی ہے اورجوتمام اندرونی پیکار اور بیرونی طاقتوں کے جابرانہ اورجارحانہ دباؤ کے باوجود برصغیر ہندوپاک میں کسی طرح نیست و نابودنہیں ہوسکتی بہت بڑے خطرے میں تھی۔ اس تہذیب کی آخری ورثہ دارسلطنت مغلیہ تھی جور۱۸۵۷ء کی پہلی جذباتی جنگ عظیم سے پہلے ہی بالکل بے دست وپاہوکر رہ گئی تھی۔ غالب اپنی خاصی طویل عمر کی آخری دودہائیوں میں عبرت اوربصیرت کے ساتھ زمانہ کی اس گردش کاتماشہ دیکھ چکے تھے۔ سرسید ایک بالغ نظر نوجوان کی حیثیت سے اسی گردش سے گزررہے تھے۔ غالب اور سرسید دونوں کواس ثقافتی میراث کے زوال کا قلق تھا اور دونوں یہی چاہتے تھے کہ کسی طرح یہ میراث تباہی سے بچ جائے لیکن دونوں کویہ بھی احساس تھاکہ اب محض پرانے ذرائع اوروسائل سے کام نہیں چل سکتا۔ غالب اور سرسید دونوں شاہ ولی اللہ سے لے کر سید احمدشہید اورشاہ اسماعیل شہید تک ان تمام مصلحین ومجاہدین کے مساعی کے دل سے معترف تھے جنہوں نے مسلم علوم اوتہذیب ومعاشرت کوبچانے اور زندہ رکھنے کے لئے جانبازانہ اقدامات کئے، لیکن نہ تو غالب ان اصلاحی تحریکوں سے پوری طرح آسودہ تھے اور نہ سرسیدہی نے اس کو کافی و شافی سمجھا۔ سرسید نے متداولہ نصاب کے مطابق تعلیم پائی تھی لیکن وہ جاگتا ہوا ذہن لے پیدا ہوئے تھے۔ وہ ان تمام اصلاحی کوششوں کی قدر کرتے تھے جو دینی معاشرت کے اکابرین سے پیشتر کرچکے تھے لیکن وہ ۱۸۵۷ء کے بعد معتوب مسلمانوں کی ابترحالت اپنی آنکھوں سے دیکھ رہے تھے اوران کی یقین ہوگیا تھا کہ ترقی یافتہ انگریزقوم کی حمایت کے بغیرمسلمان ترقی نہیں کرسکتے۔ زندہ ماضی کے زندہ عناصر رکھتے ہوئے اگران کونئی زندگی کے نئے مطالبات ومیلانات اورنئے اقداروعوامل کے ساتھ ہم آہنگ نہ بنایاگیا اور مشرقی تہذیب میں مغربی علوم وفنون کی لائی ہوئی توانائیوں سے نئی روح نہ پھونکی گئی تو نہ وہ تہذیب باقی رہے گی اورنہ اس تہذیب کے ورثہ دار زندہ رہیں گے۔ یہ صرف حکمت عملی نہیں تھی بلکہ دور تک سوچاسمجھا ہوانقطہ نظر تھا جس کوبرصغیر کی دوسری قومیتوں نے بہت پہلے سوچ سمجھ کر اس پرعمل شروع کردیا تھا اورترقی کرنے لگے تھے۔ سرسید کی فکروبصیرت کا جائزہ لیتے ہوئے ان تما م اسباب وموثرات کونظر میں رکھنا ہے لیکن یہ حقیقت بھی کم اہمیت نہیں رکھتی کہ وہ غالب کے حق شناس اورصلاح پسند اور پیش رس مزاج کے قائل اوران کے خیالات اورمیلانات سے گہرے اثرات قبول کرچکے تھے۔ پھرسرسید کی مرتب کی ہوئی ’’آئین اکبری‘‘ پر غالب نے تفریظ کے طورپر جو مثنوی لکھی ہے اور اس میں نیک نیتی اور شفقت کے ساتھ جوجچی تلی رائے دی ہے اور جس کا مطالعہ آج بھی ہمارے لئے بصیرت افروز ہوگا اس نے سرسید کی نظر اور ان کی فکر کویقینا نئی روشنی دی اور ان کووقت کے متقضا اورزندگی کے نئے مطالبے کا ازسرنو جائزہ لینے پرآمادہ کرنے میں موثر اوراہم حصہ لیا۔ مثنوی سے چندمنتحب اشعاریہاں درج کئے جارہے ہیں جن سے غالب کی دیدہ وری اور درست اندیشی کا اندازہ ہوتاہے۔ اورجوآج بھی ہم کوفکر اور گفتار کا سلیقہ سکھاسکتے ہیں۔ سب سے پہلے ’’آئین اکبری‘‘ کے سلسلے میں سرسید کی محنت کی داد دیتے ہوئے ان کو متنبہ کرتے ہیں۔

دیدہ بینا آمد وباز وقو ی

کہنگی پوشیدہ تشریف نوی

دیں کہ در تصحیح آئیں رائے اوست

ننگ و عار ہمت والائے اوست

اس کے بعد وہ ان ایجادات اورنئے اسباب ترقی اور معاشرتی اور آئینی اصلاحات کی طرف توجہ دلاتے ہیں جوانگریز نے دراصل تواپنے استعماری اور استحصالی مقاصد و مصالح کے لئے اوراقتدار حکومت کومضبوط ومستحکم بنانے کے لئے مہیاکئے مگرجوآج تک ہمارے کام آرہے ہیں۔ ان کا اعتراف نہ کرناان کے خیال میں بے ایمانی کے مترادف تھا۔ ’’صاحبان انگلستان‘‘ کے شیوہ نداز ہمارے ’’دیرکہن‘‘ کے لئے اپنے مفا دکے بہانے کیا کچھ کرگئے، اس سلسلے میں مثنوی مذکورکے کچھ اشعارملاحظہ ہوں۔

داد ودانش رابہم پیوستہ اند

ہندرا صد گونہ آتیں بستہ اند

آتشے کزسنگ بیرون آورند

ایں ہنر منداں زخس چوں آورند

تاجہ افسوں خواندہ اندایناں برآب

دودکشتی راہمی راند درآب

نغمہ ہائے بے خمہ از سازآورند

حرف چون طائر بہ پرواز آورند

کاروبار مردم ہشیار بیں

در برآئیں صد نو آتیں کاربیں

پیش ایں آئیں کہ دارد روزگار

گزشتہ آیتن دگر تقویم پار

مگریہ سب کچھ توسرسید کوچونکاکر ہوشیارکرنے اور’’مردہ پروری‘‘ سے محتاط رہنے کے لئے کہا گیا ہے۔ غالب سرسید کو ایک ہونہار نوجوان سمجھتے تھے۔ وہ ان کی ’’ہمت والا‘‘ کا صحیح اندازہ رکھتے تھے۔ اس ’’سراپافرہ ہنگ‘‘ سے ان کو بڑی امیدیں تھیں۔ سرسید ان کوبہت عزیزتھے۔ وہ مثنوی کودل سے نکلی ہوئی دعاؤں پر ختم کرتے ہیں۔

درجہاں سید پرستی دین تست

از ثنابگزر دعاآئین تست

ایں سراپا فرہ فرہنگ را

سید احمدخاں عارف جنگ را

ہرچہ خواہد از خدا موجود باد

پیش کارش طالع مسعودباد

سرسید طبیعتا نہ شاعرتھے نہ انشاپرداز، اگرچہ وہ آہی تخلص رکھتے تھے اور اوائل عمر میں انہوں نے شعرکہے جو اس وقت سامنے نہیں ہیں۔ وہ ایک مفکرتھے اور ان کاایک نظام فکر تھا جس کی بنیاد افادیت اورعملیت پر تھی۔ ان کا نصب العین ایک ایسے معاشرہ کوبچاکر اس کونئی زندگی اورتوانائی سے معمورکرتا تھا جوایک عظیم تاریخی ورثہ تھا اور جو اس وقت چارموج میں گھرا ہواتھا اورڈوب جانے کے خطرہ میں تھا۔ وہ اپنے نصب العین میں بہت بڑی حد تک کامیاب رہے اس معاشرہ کا ایک لازمی جزو اردوادب یعنی اردونظم ونثر بھی تھا۔ اس لئے ان کوسنجیدگی کے ساتھ اردوزبان اوراس کے ادب کی طرف متوجہ ہونا پڑا۔ وہ متقدمین کے تمام تخلیقی کارناموں کی قدرکرتے ہوئے شدت کے ساتھ محسوس کررہے تھے کہ اردوزبان اور اس کے ادب کے جملہ اصناف واسالیب کوبدلنے اور ان کو نئی قدروں سے بھرپور کرنے کے لئے سخت اصلاحات کی ضرورت ہے تاکہ وہ زمانہ کے نئے تقاضوں سے ہم آہنگ ہوکر ہمارے معاشرہ کو زندہ اور صحت مندرکھنے میں مددگارثابت ہوسکیں۔

سرسید اردوزبان ادب کی تاریخ میں تین اعتبارات سے اہم ہیں۔ سب سے پہلے تو اس ناقابل تردید حقیقت کویاد رکھناچاہئے کہ سرسید اس جدید اردوادب کے جداعلیٰ ہیں جس کی بنیادسائنٹیفک سوسائٹی مسلم ایجوکیشنل کانفرنس اورایم اے اوکالج علی گڑھ کے ساتھ پڑی۔ سرسید کی مقناطیسی شخصیت نے بہت جلد اپنے گرد ایسے نوجوانوں کاحلقہ پیدا کرلیا جو معقول پسند مزاج رکھتے تھے اورسرسید کے منصوبوں کو سمجھ سکتے تھے اور ان کی ہم نوائی کی جرأت کرسکتے تھے۔ پھرسرسید کی سربراہی میں ان کے رفیقوں نے اردوادب کے احیا اور اس کی بقا وترقی کے لئے جوزندہ جاویداقدامات کئے وہ ہماے ادب کی تاریخ کا ایک روشن باب بن چکے ہیں۔

خودسرسید نے اردوکے نثری ادب میں ایک ایسی صنف کااضافہ کیا جس کا وجود ہماری زبان میں نہیں تھا۔ یہ صنف مختصرمضمون یا انشائیہ ہے۔ سرسید یہ صنف انگریزی زبان سے لائے تھے جس میں وہ بیکن سے اسٹیل، ایڈیسن اور گولڈ سمتھ تک اچھی طرح بالغ ہوچکی تھی۔ ان انشائیوں میں کچھ جھلک غالب کے خطوط کی بھی مل جاتی ہے جومراسلات کی شکل میں وقتی حالات یا زندگی اور شاعری کے رموزونکات پرہلکے پھلکے مضامین بھی ہوتے تھے۔

سرسید کے لئے بڑی مشکل یہ تھی کہ ان کے سامنے اردونثر کا کوئی ایسا اسلوب نہیں تھا جس کو وہ اختیارکرتے اور جواس قابل ہوتاکہ ان کے تمام فکری نظام اور عملی منصوبوں کوسنجیدگی اورسادگی کے ساتھ کثیر سے کثیرتعداد تک پہنچاتا اور جس کو سب مانوس اورسہل پائے۔ ’’سب رس‘‘ سے نوطرز مرصع اور نوطرز مرصع سے باغ وبہار اورفسانہ عجائب تک نثرکاکوئی اسلوب سرسید کے مقاصد کے لئے موزوں نہیں تھا۔ ایک غالب کے خطوط کی نثرایسی تھی جو سنجیدہ تھی اور شگفتہ بھی اور ہرقسم کے معانی اور مفاہیم کے اظہار پر قادرتھی۔ سرسید نے اسی کو اختیار کیا اور اس میں انگریزی انشائیہ کے اسالیب کی کچھ خصوصیات کوداخل کرکے اس کوبالکل اپنا اسلوب بنالیا جو ان کے پیغام کوصاف اور شفاف زبان میں عوام تک پہنچاسکتاتھا۔ مگرسرسید کی نثراس ادبی کشش سے یک قلم عاری ہے جو’’عودہندی‘‘ اور’’اردوئے معلی‘‘ کی ممتازخصوصیت ہے۔

حالی نے شاید سرسید کی نثر میں اس کمی کومحسوس کرلیا۔ وہ غالب کے محبوب شاگردوں میں تھے اورغالب سے بہت قریب رہ کر ان کی شاعری اوران کی اردو نثر دونوں کے مزاج کوسمجھے ہوئے تھے اور دونوں کی عظمت کے راز سے بہ خوبی آگاہ تھے۔ وہ اپنے اسلوب میں وہ ’’سادگی وپرکاری‘‘ تونہ پیدا کرسکے جوغالب کے اردو خطوط کی جان ہے لیکن ان کی سادہ اوربے تکلف نثر میں ایک متین اور متوازن ادبی کیفیت ہوتی ہے۔ حالی کا نثری اسلوب ایک جامعیت بھی اپنے اندررکھتا ہے اورایسا ہوتا ہے کہ اس میں تنقیدیں، سوانح انشائیے سبھی کچھ لکھے جاسکتے ہیں کہ ہم کہہ سکتے ہیں کہ حالی کا اسلوب غالب اور سرسید کے اسالیب کے درمیان ایک مفاہمت ہے۔ اگرحالی نہ ہوتے تو جدیداردو نثر کے ادب بننے میں نہ جانے کتناعرصہ لگتا۔

نثری روایات عصرجدید یا نئی نسل کی نثر کوکس طرح او رکس حد تک متاثر کرتی ہیں؟ یہ بات آسانی سے ہماری سمجھ میں آجاتی ہے لیکن کسی زبان کی شاعری بالخصوص بربطی یاغنائی (Lyric) شاعری میں زبان کی نثرکی تہذیب و تحسین میں کس حد تک شریک رہتی ہے۔ اس کا اندازہ مشکل سے ہوتاہے۔ اس لئے کہ نثر پر شاعری کا جواثرہوتا ہے وہ بہت خفی اورلطیف ہوتاہے۔ یہ خود اپنی جگہ ایک موضوع ہے جومفصل بحث چاہتاہے۔ بہرحال غالب کی نثراورنظم دونوں نے جدید اردونثر کے اسالیب کے ارتقا میں بڑا حصہ لیا ہے۔ ان کے اردوخطوط نے ہماری ’’نثر کوسادگی اور بے ساختگی کے ساتھ ساتھ چستی اورطراری دی اور ان کی شاعر نے نثر میں فکری تعمق اورخیالی نزاکت، حکیمانہ فرزانگی اورجمالیاتی لطافت پیداکی۔ حالی اور شبلی سے پریم چنداورچکبست اورنیاز فتح پوری اوران کے ہم نواؤں تک کے اسالیب کونظرمیں رکھئے۔ زمانہ (کانپور) ادیب (الہ آباد) صلائے عام مخزن، تمدن، نقاد سے ہمایوں، نیرنگ خیال نگار اور اس دور کے دوسرے اردوجرائد میں نثر کے اسالیب میں جوتنوعات پائے جاتے ہیں ان کا غور سے مطالعہ کیجئے توبیسویں صدی سے غالب تک اردونثر ایک تاریخی سلسلہ ہے جس میں کہیں کوئی خلایاعدم ارتباط محسوس نہیں ہوتا۔ بیسویں صدی کی پہلی دودہائیوں تک ایک خاص طرزنگارش ہماری نثری ادب میں بہت مقبول رہی جس کو مبہم طور پر ادب لطیف کہا جاتارہا اور جس کو خواہ مخواہ کچھ لوگوں نے ایک علیحدہ ادبی صنف سمجھا حالانکہ وہ محض ایک اسلوبی میلان تھا۔ اس میلان کے سلسلے میں ایک نئی ادبی صنف ضرور وجود میں آئی جو شعر منثور (Prose Poen) کہلاتی اور کچھ عرصہ تک رائج رہی۔ یہ میلان جدید رومانیت یعنی عہد وکٹوریہ کے اواخر کا ترکہ تھا اور برطانوی اقتدار کے استحکام کے ساتھ برصغیر کے فکر واظہار اوراس کی تہذیب ومعاشرت پراثراندازہونے لگا۔ شعرمنثور کی نئی صنف براہ راست اسکروائلڈ اور ٹیگور کے مطالعہ کا نتیجہ تھی اورمغرب ہی سے آئی تھی۔ یہ سب باہری اثرات تھے۔ لیکن اگرغالب کی گمبھیر شاعری اور اس کی بلیغ اسلوبی کیفیتیں ہمارے تخلیقی شعور میں جذب نہ ہوچکی ہوتیں توان اثرات کے اظہار کے لئے زبان اوراسلوب تراشنا دشوارہوتا۔

لیکن کسی دوریا کسی دبستان یاکسی فرد واحد کی شاعری کا اثرآئندہ دور پرکیا پڑا؟ ہم کوبعدکے شاعروں کے کلام ہی سے اس کا صحیح اندازہ ہوسکتا ہے۔ حالی تک غالب کا اثرزیربحث آچکاہے۔ اب بیسویں صدی کے آغاز سے تیس سال کی اردوشاری پرنظرڈال لی جائے۔ اس تیس سال نے اردوشاعری کوفکر واحساس کی نئی نزاکتوں اور بلاغتوں اور زبان واسلوب کی توانائیوں اوراثرفرینیوں سے جس طرح مالامال کیا اس کی نظر اس سے پہلے نہیں ملتی۔ جدید شاعری کی ان تمام نت نئی صوری و معنوی کیفیات میں غالب کی فکروگفتا رکے آثار وعلامات بہت واضح نظر آتے ہیں۔

سب سے پہلے جواردوشعرااس سلسلے میں یادآتے ہیں وہ مولانا وحشت کلکتوی، علامہ اقبال حسرت موہانی اورشادعظیم آبادی ہیں۔ مولانا رضا علی وحشت معمولی شخصیت کے آدمی نہیں تھے۔ وہ عالم متجراور فاصل اجل تھے۔ اردوفارسی اور عربی زبانوں اوران کے ادبیات پر وہ ماہرانہ اور مبصرانہ عبور رکھتے تھے۔ انگریزی زبان پربھی ان کو اتنی قدرت حاصل تھی کہ اس میں تنقیدی مضامین لکھا کرتے تھے جومختلف انگریزی اخبارورسائل میں چھپ سکتے ہیں۔ اردوزبان میں بھی ان کی ادبی تنقیدیں اپنے زمانے میں اختراعات کا درجہ رکھتی تھیں۔ یہ تنقیدیں زیادہ تر اس دور کے سب سے زیادہ مقتد ر اردوجریدہ؟ لاہور میں شائع ہوتی رہیں۔ وہ اسلامیہ کالج کلکتہ میں شعبہ فارسی واردو کے صدریامعلم اول تھے۔ ان کی یہ حیثیات مسلم تھیں اورا کی بنا پر نہ صرف صوبہ بنگال میں بلکہ برکوچک کے دوسرے صوبوں میں بھی ان کی عزت اور تعظیم کی جاتی تھی لیکن ہمارے برکوچک کی تہذیبی تاریخ میں وحشت کلکتوی کا مستقل اورپائدار اعتبار کچھ اورہے۔ وہ اردو اورفارسی دونوں زبانوں میں نہ صرف اچھے شعر کہتے تھے بلکہ دونوں زبانوں کی شاعری میں اپنا منفرد اور ممتازمقام رکھتے تھے۔ اس سے پہلے بیسویں صدی کے اوائل کے بعض ماہواررسائل کاذکرآچکاہے جنہوں نے سرسید ک رسالہ تہذیب الاخلاق کے بعداردوادب کونئی شاہراہ پرلگانے کے سلسلے میں بڑا کام کیاہے۔ ان رسائل میں ’’مخزن‘‘ لاہور مرکزی حیثیت کامالک ہے۔ دوسرے رسائل اپنے تنوعات کے باوجود اساسی اعتبار سے ’’مخزن‘‘ کے ہم خیال ہم نظر اور ہم آہنگ تھے۔ اس لئے اگر ۱۹۰۵ء سے ۱۹۲۰ء تک کے ادبی اورثقافتی اکتسابات کوکسی دبستان کے نام سے موسوم کیاجائے تواس کو ’’دبستان مخزن‘‘ کہنا بہت مناسب ہوگا۔ وحشت کلکتوی اسی دبستان کے تربیت یافتہ تھے اور اپے ہم دبستانوں میں بڑی قدراورعزت کی نگاہ سے دیکھے جاتے تھے۔ اس زمانہ میں کسی مانے ہوئے استادسے تلمذضروری تھا ورنہ توآغاز شاعر بے استاداکہا جاتا تھا۔ وحشت کوبھی اپنے لئے استادمنتخب کرناپڑا۔ یہ ابوالقاسم شمس تھے جو عبدالغفور خاں نساخ کے بیٹے اور داغ دہلوی کے شاگردتھے لیکن شمس کا جلدہی انتقال ہوگیا اورپھر وحشت نے کسی دوسرے سے اصلاح نہیں لی۔ وحشت شاعری کی خدادادصلاحیت لے کرپیدا ہوئے تھے اور انہوں نے خود’’کسب فن‘‘ کے لئے بڑا ریاض کیا۔ ان کا ذہن دوسروں سے بہترین اثرات قبول کرکے جذب کرلینے کی قابلیت رکھتا تھا۔ چنانچہ ان کے کلام میں میر، مومن اور داغ سبھی کے کچھ نہ کچھ آثار مل جاتے ہیں لیکن خود ان کوغالب کی پیروی پرناز تھا اوروہ اس کااعلان بھی کرتے تھے۔ ایک فارسی شعر میں کہتے ہیں،

سخن آموخت غالب از نظیری وحشت از غالب

چراغے راکہ دودے ہست در سرزود درگیرد

فارسی میں بھی وحشت نے انہیں اساتذہ کے کلام کواپنے لئے نمونہ بنایا جن کی پیروی غالب کرگئے تھے یعنی سعدی، فغانی، حزیں، عرفی، نظیری، ظہوری، صائب وغیرہ۔

ان کا تخلص بھی اس بات کی طرف اشارہ کرتا ہے کہ وہ غالب کے ساتھ ظاہری اورباطنی ہرنوع کا قرب اقرب محسوس کرناچاہتے تھے۔ غالب کے ایک نہایت عزیز اور سریرآوردہ شاگردسید غلام علی خاں کاتخلص وحشت تھا۔ سب سے پہلے حالی نے وحشت کلکتوی کے پہلے مجموعہ کلام ’’دیوان وحشت‘‘ (مطبوعہ ۱۹۱۰ء) پررائے دیتے ہوئے اس بات کا خیال دلایا۔ وحشت کے کلام میں غالب کی متانت فکر اور نزاکت احساس کے ساتھ غالب کے اسلوب کی ندرت اورطرفگی اعتدال اور ہمواری کے ساتھ پائی جاتی ہے۔ ان کے زمانہ کے اکابر میں کون ہے جس نے ان کی شاعری کی ان خصوصیات کوتسلیم نہ کیا ہو۔ بزرگوں میں حالی اور شبلی نے فراخ دلی کے ساتھ وحشت کے کلام میں غالب اور مومن کے انداز فکر اور طرزاظہار کی تعریف کی ہے۔ وحشت کے ان معاصرین میں جوکہ کم وبیش ان کے ہم عمرتھے اورجن سے ان کے تعلقات مخلصانہ تھے سرعبدالقادر ڈاکٹر اقبال اور مولانا ظفر علی خان تاریخ سازہستیاں تھیں۔ یہ سب لوگ صدق دل سے وحشت کی شاعری کے قدرشناس تھے اورسب نے جی کھول کر ان کے کلام کی داددی ہے۔

وحشت کا ذکرکچھ طویل ہوگیا۔ اس کی ضرورت تھی۔ ہم وحشت کوبھول چکے ہیں اوران کی یاد کے بغیر کم سے کم شاعری میں غالب کی نکتہ سرائی کے سطحی یا زیریں ارتعاشات کا تاحال جوسلسلہ جاری ہے اس میں ایک خلاپیدا ہوجائے گا۔

اقبال کے نظام فکر اوراندازبیان میں ’’گفتہ غالب‘‘ کے نشانات وعلامات اتنے واضح ہیں کہ ان کی مزید توضیح تحصیل حاصل ہوگی۔ اقبال کائناتی بصیرت اور آفاقی شعور لے کرپیدا ہوئے تھے۔ وہ خودفطرتا ایک مفکرتھے اورمفکرین کی عالمی برادری میں ان کا ایک مقام ہے۔ ان کامطالعہ بھی نہایت وسیع اورجامع تھا۔ مشرق اور مغرب کے قدیم اورجدید تمام ارباب فکر وفن کے کارناموں نے تامل کے ساتھ پڑھا تھا اور ان سے اپنے دل ودماغ کی تہذیب کی تھی۔ وہ کائنات کی ماہیئت فطرت انسانی کے رموز واسراراورانسانی زندگی کے مسائل ومعاملات کوسمجھے ہوئے تھے اوران پر اپنے سوچے ہوئے خیالات رکھتے تھے۔ ان کو احساس تھاکہ ان کو نئے زمانہ کونیاپیغام دیناہے۔

یہ عجیب اتفاق ہے کہ وحشت کلکتوی کی طرح اقبال بھی داغ دہلوی ہی کے شاگرد ہوئے اوران کے بتدائی کلام میں داغ کے اثرات صاف نمایاں ہیں۔ داغ کی وفات پر انہو ں نے جونظم کہی ہے اس سے ظاہرہوتا ہے کہ ان کے دل میں استاد کی کتنی عزت اور محبت تھی۔ وہ زندگی کاایک حکیمانہ نظریہ رکھتے تھے جس کی ترکیب میں دنیا کے عظیم ترین دماغوں کے عناصر وعوامل داخل تھے لیکن جو بہرحال ان کااپنا نطریہ تھا۔ ان کااپنے عہد کے لئے ایک پیغام تھا۔ جواسلاف واخلاف کے تاثرات وتاملات کا نہایت صحیح اور خوش آہنگ امتزاج ہوتے ہوئے بھی اپنی انفرادی توانائی کاحامل تھا۔ ایسا صاحب فکر ونظر شاعرظاہر ہے داغ کی منزل پر ٹھہرنہیں سکتاتھا۔ پھر غالب کی طرف ان کے ذہن کامڑجانا اور پھرغالب ہی کے فکری اوراسلوبی اجتہاد افرینی سے اپنے تخلیقی شعور کوبرابرتقویت پہنچاتے رہنا قدرتی بات تھی۔ اقبال کو اپنے برصغیر میں اگرکوئی مغربی مفکروں اور شاعروں کاہمسرنظر آتاتھا توہ وغالب تھے۔ انہو ں نے غالب کی خدمت میں اپنا خراج عقیدت پیش کرتے ہوئے ’’گلشن دیمر‘‘ کے آسودہ خاک گوئٹے کو غالب کا ’’ہمنوا‘‘ کہا ہے اور گوئٹے مغرب کے ان حکیم شاعروں میں سے تھا جن کی آواز کے ارتعاشات اقبال کی شاعری میں جابجا محسوس طورپرملتے ہیں۔ اقبال کی شاعری میں غالب کی توانائی اورنیرنگی زبان وبیان کا اثرکتناجاری وساری اور کس قدر مربوط اور مستقل ہے۔ اس کوسمجھنے کے لئے زیادہ تجزیہ یاتشریح کی ضرورت نہیں ’’شکوہ‘‘ اور ’’جواب شکوہ‘‘ اور ’’شمع وشاعر‘‘ سے ’’خضرراہ‘‘ اور ’’طلوع اسلام‘‘ اور پھر ’’بال جبریل‘‘ اور’’ضرب کلیم‘‘ تک کیانظموں میں کیا غزلوں میں اقبال کاکلام قدم قدم پرغالب ہی کی یاددلاتاہے اورہم کہہ سکتے ہیں کہ ’’شاعرفردا‘‘ کی نوا میں ’’گلشن ناافریدہ‘‘ کی عندلیب کی نغمہ سنجی کچھ اس طرح پیوست ہے کہ اس کوکسی ترکیب سے الگ نہیں کیاجاسکتا۔

اقبال ہی کے سلسلے میں ان کے ہم عصر شاعرچکبست کاذکر کردینا بے محل نہ ہوگا۔ سماجی اورسیاسی مسائل میں دونوں کے نقطہ نظر میں فرق تھا مگردونوں اسباب و حالات کے ایک ہی سلسلہ اورزمانہ کی ایک ہی فضا کی مخلوق تھے وہ اوران کے رفیق بش نرائن اورابرآتش۔ یاشنکرنسیم اورمیرانیس کے کافی حد تک متاثر تھے لیکن چکبست کے کلام کے پڑھنے سے معلوم ہوتا ہے کہ فکر غالب اور بیان غالب سے وہ کچھ کم مستفیض نہیں ہوئے۔ انہوں نے نہایت معقول اور متوازن ذہن پایا تھا۔ ان کی شاعری اوران کی تنقید میں جوٹھہراؤ اوراعتدال ملتاہے وہ اس بات کا ثبوت کہ ان کا ادبی شعور حالی سے براہ راست متاثرتھا۔

یہ فقرہ بہت عام ہوگیاہے کہ حسرت نے اردوغزل کا احیاکیا۔ لیکن جیسا کہ ہم کہہ چکے ہیں کہ غزل کی متانت اور اس کی پاک دامنی کوحالی محفوظ کرگئے تھے۔ حسرت نے حالی کی روایت کو فروغ دیا اور غزل کے ناموس کوبچاکر اس میں نئی جان ڈالی اورنئی توانائیاں پیدا کیں۔ حسرت سے اردوغزل میں نہضت کا دور شروع ہوتاہے۔ میں ایک سے زائد بارحسرت کو انتخابی شاعر (Electic Poet) کہہ چکا ہوں۔ میرسے مصحفی اور مصحفی سے غالب تک ہربڑے شاعر کا رنگ ان کی شاعری میں سلیقہ کے ساتھ سمویاہوا ملتا ہے۔ وہ خود امیراللہ تسلیم کے شاگرد تھے۔ اس طرح ان کی شاعری کاشجرہ مومن تک پہنچتا ہے اور اس سے انکار نہیں کیاجاسکتا ہے کہ مومن اوران کے نامور تلامذہ مثلا شیفتہ اصغرعلی خاں نسیم دہلوی مولا بخش قلق وغیرہ کا اندازسخن حسرت کے کلام میں جابجاملتا ہے۔ ان کی غزلوں میں ایسے حصہ کی بھی کمی نہیں جن کا تعلق معاملہ بندی اورادابندی سے ہے۔ ایسے اشعار میں مصحفی جرأت اورمومن کا رنگ جھلکتا نظر آتاہے لیکن تاثر کی پرگداز سنجیدگی الفاظ کے انتخاب کی ندرت ترکیب الفاظ کی تازہ کاری کا جہاں تک تعلق ہے اس امر کی شہادت بھی کثرت کے ساتھ ملتی ہے کہ حسرت کی شاعری میں غالب کی روح بھی کام کررہی ہے۔ حسرت کے ذہن کو غالب سے فطری قریب تھا۔ ان کے مزاج کوغالب کی جری اوربے باک طبیعت کے ساتھ خلقی یگانت تھی جوشعوری بھی تھی اور غیرشعوری بھی۔ اس کی ایک ظاہر علامت تو یہ ہے کہ اپنی طالب علمی کے زمانہ میں جب ایم اے اوکالج علی گڑھ میں انہوں نے اردو کی ادبی انجمن قائم کی تو اس کا نام ’’اردوئے معلی‘‘ رکھا۔ علی گڑھ مسلم یونیورسٹی میں شعبہ اردوکی ادبی انجمن کانام آج تک یہی ہے۔ پھرحسرت نے اپنے مشہور اردوجریدہ کابھی نام ’’اردوئے معلی‘‘ رکھا۔

حسرت اپنی شاعری سے باہر ایک جامع الحیثیات شخص تھے۔ سماجی اقتصادی زندگی برصغیر کی آزادی اورسامراج سے بغاوت کے بارے میں ان کا ایک مستحکم نظریہ تھا اوروہ ایک واضح اور مستقیم عملی نصاب کے علمبردار تھے جس پر سب سے پہلے وہ خودکاربندرہے۔ شاعری میں بھی ان کا ذوق جانبازی اور حق کے لئے سرکٹادینے کاولولہ اپنے کورموز واستعارات کے پردے میں ظاہر کرتارہتا ہے لیکن قضا وقدر تخلیق یافلسفہ کی زبان میں ’’وجودیات‘‘ ’’علمیات‘ اورغائیات جیسے مباحث پراگران کے کچھ خیالات رہے بھی ہوں توان کی بابت حسرت کی شاعری سے ہم کوئی قیاس نہیں کرسکتے۔ حسرت خالص عشق کے شاعر تھے اور عشقیہ شاعری میں حسرت کا فکری آہنگ اور اسلوبی ہنجارمومن اورغالب ہی کی عشقیہ شاعری کی یادتازہ کرتا رہتاہے۔

شادعظیم آبادی کاسلسلہ تلمذ خواجہ میر درد سے ملتا ہے۔ وہ میردرد کے حلقہ کے دوسرے معروف شعرا میر ضیا خواجہ میراثر میرمحمدی بیدار سے بھی متاثر ہیں۔ میرمصحفی اور آتش کی آوازوں کی گونج بھی ان کی غزلوں میں محسوس ہوتی ہے۔ ان کی زبان میں جوسلاست اور روانی ہوتی ہے اورالفاظ کی دردست میں جوقرینہ ہوتا ہے اس میں انیس کا بھی حصہ ہے لیکن میں حیث الکل ان کے اشعار میں ایک پرگداز تامل ایک تہہ رس تفکر کا احساس ہوتاہے جو ذہن جدید کی ایک عام شناخت ہے اورجس کا رشتہ غالب ہی سے ملتاہے۔

یہ امرقابل لحاظ ہے کہ اردومیں شاعری کی وہ صنف جواصطلانظم کہلاتی ہے نہ صرف وجودمیں آچکی تھی بلکہ اچھی طرح بالغ ہوگئی تھی۔ اقبال چکبست سرورجہاں آبادی وغیرہ کی کوششوں سے اردونظم میں وہ تاثراتی گمبھیرپن وہ فکری تعمق وہ اسلوبی نکھار آگیاتھا جو ان سے پہلے نہیں تھا۔ شوق قدوائی جواسیرلکھنوی کے شاگرد تھے اورایک قدیم دبستان کی آخری یادگارتھے۔ اپنی مشہور مثنوی اور نظموں بالخصوص ’’عالم خیال‘‘ اور’’بہار‘‘ کے ذریعہ ہم کو نئی رومانیت سے آشناکرچکے تھے۔ اس دور کے مقتدر ادبی رسائل کی ورق گردانی کیجئے جن کی سربراہی میں ’’مخزن‘‘ کورہا تھاتوآپ کوبہت سے شاعر ایسے ملیں گے جنہوں نے جدید اردونظم کی تربیت اورتہذیب میں نمایاں حصہ لیاہے مگرجن کو آج ہم بھولے بیٹھے ہیں ان میں سب سے زیادہ بلند بانگ مولاناظفر علی خان تھے جونہایت نوفکر آتش نوااور زودگوشاعر ہونے کے علاوہ بڑے شعلہ زبان اور شعلہ نگار مقرر اورصحافی بھی تھے۔ حکومت برطانیہ حسرت موہانی کی طرح ان کوبھی بہت خطرناک آدمی سمجھتی تھی اوران کو ’’پیدائشی باغی‘‘ کہتی تھی۔ یہ تمام لکھنے والے جہاں تک نئے انداز احساس اور نئے میلان فکروتخیل کا تعلق ہے مغربی تعلیم اورمغربی تصورات ونظریات کے ممنون تھے لیکن زبان وبیان کی نئی ترا وخراش اور نئے اوضاع واسالیب کی اختراع میں غالب ہی سے سہارا مل رہا تھا۔ غالب کے بعداردوشاعری کی نئی نسل کی رہنمائی اقبال نے کی۔

نظم کی روزافزوں مقبولیت کے باوجود ابھی تک غزل ہی اردوشاعر کی نمائندگی کررہی تھی اورمشاعروں میں اورعوام کے درمیان غزل ہی پسند کی جاتی تھی اور غزل ہی کی مانگ تھی۔ غزل کی یہ سحرآفرینی آج تک اپناکام کررہی ہے۔