mujhe to rañj qabā-hā-e-tār-tār kā hai

ḳhizāñ se baḌh ke guloñ par sitam bahār kā hai

mujhe to ranj qaba-ha-e-tar-tar ka hai

KHizan se baDh ke gulon par sitam bahaar ka hai

'shaukat' hamāre saath baḌā hādisa huā

ham rah ga.e hamārā zamāna chalā gayā

'shaukat' hamare sath baDa hadisa hua

hum rah gae hamara zamana chala gaya

baḌe vasūq se duniyā fareb detī rahī

baḌe ḳhulūs se ham e'tibār karte rahe

baDe wasuq se duniya fareb deti rahi

baDe KHulus se hum e'tibar karte rahe

ajiib baat hai din bhar ke ehtimām ke ba.ad

charāġh ek bhī raushan huā na shaam ke ba.ad

ajib baat hai din bhar ke ehtimam ke baad

charagh ek bhi raushan hua na sham ke baad

ravish ravish pe chaman ke bujhe bujhe manzar

ye kah rahe haiñ yahāñ se bahār guzrī hai

rawish rawish pe chaman ke bujhe bujhe manzar

ye kah rahe hain yahan se bahaar guzri hai