ہم بھی غالبؔ کی طرح کوچۂ جاناں سے اسدؔ

نہ نکلتے تو کسی روز نکالے جاتے

خود بخود چھوڑ گئے ہیں تو چلو ٹھیک ہوا

اتنے احباب کہاں ہم سے سنبھالے جاتے

عمر بھر ماں کی نصیحت پہ زمانے میں اسدؔ

فاطمہ زہرا کے بچوں سے وفاداری کی

اس محبت نے ہمیں جوڑ دیا آپس میں

ورنہ ہم دونوں کا اک جیسا عقیدہ تو نہ تھا

آج دیکھا ہے اسے جاتے ہوئے رستے میں

آج اس شخص کی تصویر اتاری میں نے

جو اپنے زعم میں رہتے ہیں ایسے لوگوں کو

نظر میں رکھتے ہیں دل سے اتار دیتے ہیں

غالبؔ کے مرتبے سے یہ واقف نہیں اسدؔ

یہ بد لحاظ نسل ہے عہد جدید کی

لب پہ اک حرف تمنا ہے گدائی تو نہیں

یہ مری اپنی کمائی ہے پرائی تو نہیں

اک نئی طرز کا کردار دیا جائے گا

اس کہانی میں مجھے مار دیا جائے گا

ژالہ باری بھی رہی دھوپ بھی تھی بارش بھی

تیری یادوں کے علاقے میں یہ منظر دیکھے

دونوں نے دونوں ہاتھوں سے لوٹا ہمیں اسدؔ

پردہ نشیں بھی تھے کئی مسند نشیں بھی تھے

زخم سینے پہ ہوئے اتنے کہ سینے سے رہے

ہم ترے ہجر میں جیتے ہیں تو جینے سے رہے

چپ چاپ اپنے یار کی دہلیز پر مرے

دنیا کہے گی ہم بھی کسی چیز پر مرے

کوئی تو دیکھے مری بے بسی محبت میں

میں آپ اپنی جہاں میں ہنسی اڑاتا پھروں

بچ بچ کے تیری راہ سے چلنا تو تھا مجھے

تو جو بدل گیا ہے بدلنا تو تھا مجھے

ظلم تو یہ ہے کہ ازبر نہ رہے غربت میں

ایک حافظ سے جوانی کی حفاظت نہ ہوئی

ہم بھی غالبؔ کی طرح کوچۂ جاناں سے اسدؔ

نہ نکلتے تو کسی روز نکالے جاتے

یوسف کے لیے ہیں سر بازار اکٹھے

قسمت سے ہوئے آج خریدار اکٹھے

صرف اک تیری نگاہوں کا چنیدہ تو نہ تھا

میں سبھی کا تھا مجھے تو نے خریدا تو نہ تھا

تشنگی ہے مری آنکھوں میں اسے ملنے کی

پیکر یار کا بھی چاہ ذقن کھینچتا ہے

راستہ صاف نظر آتا ہے راہی تو نہیں

کچھ کہو راہ محبت میں تباہی تو نہیں

ثبوت آج بھی میری کتاب میں ہے اسدؔ

وہ ایک رقعہ ترا تیرے دستخط کے ساتھ

سارے مرتے ہیں اسی ایک پری چہرے پر

ہم بھی ان گلیوں میں بے کار سے ہو آتے ہیں

ٹوٹا ہوا وجود ہے ٹوٹا ہوا ہے جسم

میرا تو مہ جبینوں نے لوٹا ہوا ہے جسم

وسوسے ڈستے رہے عشق میں سانپوں کی طرح

بے عصا راہ خطرناک پہ دن گزرے ہیں

طیور حسن بھی کل تک قفس میں ہوں گے اسدؔ

کہ ہم نے دیکھے ہیں دانے قریب جالوں کے

مری نگاہ رہے صرف روئے قاتل پر

گلوں پہ خنجر بے آبدار چلتا رہے

ضبط کے شہر سے نکلا ہے جو لشکر لے کر

دشت حیرت کی کڑی دھوپ میں جلتا جائے

قافلے والوں کو کھا جائے گی یہ سست روی

ساربانوں کو سبک خیز کریں چلتے چلیں

ذاکر آل محمدؐ ہے تو منبر پہ اسدؔ

ابن مرجانہ کے جیسا یہ لبادہ کیسا

نت نیا تو نے زمانے میں خریدا بدلا

تیرے کہنے پہ کہاں ہم نے عقیدہ بدلا

گزر نہ جائے یہ موسم بسنت کا موسم

بنفشہ پھول کھلے ہر طرف زمیں کے لیے

ڈوب جائے نہ کہیں زور تلاطم میں اسدؔ

اک نظر شاہ امم میرے سفینے کی طرف

حیرت ہے آج چشم زمانہ شناس میں

دیکھا گیا ہے اس کو غزل کے لباس میں

پنبہ در گوش سمجھتے ہیں کہیں ہم کو اسدؔ

اونچی آواز میں جو شعلہ فشاں بولتے ہیں