متاع درد مآل حیات ہے شاید

دل شکستہ مری کائنات ہے شاید

حوصلہ سب نے بڑھایا ہے مرے منصف کا

تم بھی انعام کوئی میری سزا پر لکھ دو

یوں بھی کیا ہے ہم نے حق دلبری ادا

اپنی ہی جیت اپنے ہی ہاتھوں سے ہار دی

اب اس مقام پہ ہے موسموں کا سرد مزاج

کہ دل سلگنے لگے اور دماغ جلنے لگے

ہیں ان میں بند کسی عہد رستخیز کے عکس

یہ میری آنکھیں عجائب گھروں میں رکھ آنا

ہے میری آنکھوں میں عکس نوشتہ دیوار

سمجھ سکو تو مرا نطق بے زباں لے لو

شوق بے حد نے کسی گام ٹھہرنے نہ دیا

ورنہ کس گام مرا خون تمنا نہ ہوا

تجھے خبر ہی نہیں ہے یہ قصۂ کوتاہ

جہاں پہ بت نہ گرے کب وہاں حرم اترا

ہوں واردات کا عینی گواہ میں مجھ سے

یہ میری موت سے پہلے مرا بیاں لے لو

عام ہے اذن کہ جو چاہو ہوا پر لکھ دو

عشق زندہ ہے ذرا دست صبا پر لکھ دو

انہیں گماں کہ مجھے ان سے ربط ہے سالمؔ

مجھے یہ وہم انہیں التفات ہے شاید

اب مجھ سے سنبھلتی نہیں یہ درد کی سوغات

لے تجھ کو مبارک ہو سنبھال اپنی یہ دنیا

عکس کچھ نہ بدلے گا آئنوں کو دھونے سے

آذری نہیں آتی پتھروں پہ رونے سے