ḳhudā ke vāste mohr-e-sukūt toḌ bhī de

tamām shahr tirī guftugū kā pyāsā hai

KHuda ke waste mohr-e-sukut toD bhi de

tamam shahr teri guftugu ka pyasa hai

ab diloñ meñ koī gunjā.ish nahīñ miltī 'hayāt'

bas kitāboñ meñ likkhā harf-e-vafā rah jā.egā

ab dilon mein koi gunjaish nahin milti 'hayat'

bas kitabon mein likkha harf-e-wafa rah jaega

chehre ko tere dekh ke ḳhāmosh ho gayā

aisā nahīñ savāl tirā lā-javāb thā

chehre ko tere dekh ke KHamosh ho gaya

aisa nahin sawal tera la-jawab tha

ye iltijā duā ye tamannā fuzūl hai

sūkhī nadī ke paas samundar na jā.egā

ye iltija dua ye tamanna fuzul hai

sukhi nadi ke pas samundar na jaega

ye jazba-e-talab to mirā mar na jā.egā

tum bhī agar miloge to jī bhar na jā.egā

ye jazba-e-talab to mera mar na jaega

tum bhi agar miloge to ji bhar na jaega