saaf batā de jo tū ne dekhā hai din raat

duniyā ke Dar se na rakh dil meñ dil kī baat

saf bata de jo tu ne dekha hai din raat

duniya ke Dar se na rakh dil mein dil ki baat

Dūbne vāloñ par kase duniyā ne āvāze

sāhil se kartī rahī tūfāñ ke andāze

Dubne walon par kase duniya ne aawaze

sahil se karti rahi tufan ke andaze

kuchh kahne tak soch le ai bad-go insān

sunte haiñ dīvāroñ ke bhī hote haiñ kaan

kuchh kahne tak soch le ai bad-go insan

sunte hain diwaron ke bhi hote hain kan

tanhā tū rah jā.egā koī na hogā saath

jaise hī ye log haiñ pakaḌ inhī kā haath

tanha tu rah jaega koi na hoga sath

jaise hi ye log hain pakaD inhi ka hath

kaun musāfir kar sakā manzil kā dīdār

palak jhapakte kho ga.e rāhoñ ke āsār

kaun musafir kar saka manzil ka didar

palak jhapakte kho gae rahon ke aasar

ravish ravish par baaġh haiñ kāñTe kaliyāñ phuul

maiñ ne kāñTe chun liye huī ye kaisī bhuul

rawish rawish par bagh hain kanTe kaliyan phul

main ne kanTe chun liye hui ye kaisi bhul