mohabbat kā taqāza hai zarā duurī rakhī jaa.e

bahut nazdīkiyāñ aksar baḌī taklīf detī haiñ

mohabbat ka taqaza hai zara duri rakhi jae

bahut nazdikiyan aksar baDi taklif deti hain

ye baat sach hai tumheñ zulm meñ mahārat hai

ye baat bhī to haqīqat hai maiñ nahīñ Dartā

ye baat sach hai tumhein zulm mein mahaarat hai

ye baat bhi to haqiqat hai main nahin Darta

shāyad tumhārī diid mayassar na ho kabhī

aao ki tum ko dekh leñ fursat se aaj ham

shayad tumhaari did mayassar na ho kabhi

aao ki tum ko dekh len fursat se aaj hum

tumheñ sāhil kī hasrat hai hameñ tūfāñ se laḌnā hai

chalo behtar kiyā tum ne kinārā kar liyā ham se

tumhein sahil ki hasrat hai hamein tufan se laDna hai

chalo behtar kiya tum ne kinara kar liya hum se

ye gardish hai zamāne kī maiñ tum se duur huuñ lekin

maiñ jitnā duur jaatā huuñ tum itnā yaad aate ho

ye gardish hai zamane ki main tum se dur hun lekin

main jitna dur jata hun tum itna yaad aate ho

terī koshish hai charāġhoñ ko bujhā de mere

merī hasrat hai tire ghar meñ ujālā jaa.e

teri koshish hai charaghon ko bujha de mere

meri hasrat hai tere ghar mein ujala jae

agar nākām honā hai

mohabbat kaam kī shai hai

agar nakaam hona hai

mohabbat kaam ki shai hai

vo ik lamha mohabbat kā jab us ne hāl-e-dil pūchhā

vo ik lamha hazāroñ saal kī furqat pe bhārī thā

wo ek lamha mohabbat ka jab us ne haal-e-dil puchha

wo ek lamha hazaron sal ki furqat pe bhaari tha

ek dhāre meñ bah rahe haiñ ham

log kahte haiñ zindagī is ko

ek dhaare mein bah rahe hain hum

log kahte hain zindagi is ko