دکھوں کے روپ بہت اور سکھوں کے خواب بہت

ترا کرم ہے بہت پر مرے عذاب بہت

شہروں کے سارے جنگل گنجان ہو گئے ہیں

پھر لوگ میرے اندر سنسان ہو گئے ہیں

ٹوٹی ہے یہ کشتی تو مرے ساتھ سفر کو

وہ جان مسافت مرا تیار ہوا ہے

دور تک یہ راستے خاموش ہیں

دور تک ہم خود کو سنتے جائیں گے

اس خوبیٔ قسمت پہ مجھے ناز بہت ہے

وہ شخص مری جاں کا طلب گار ہوا ہے

فریب قرب یار ہو کہ حسرت سپردگی

کسی سبب سے دل مجھے یہ بے قرار چاہئے

مجھے عزیز ہے بے احتیاطیٔ سادہ

نہ شوق ہے نہ ہنر اس کو آزمانے کا

غم زمانہ جب نہ ہو غم وجود ڈھونڈ لوں

کہ اک زمین جاں جو ہے وہ داغ دار چاہئے

لمحۂ امکان کو پہلو بدلتے دیکھنا

آتش بے رنگ میں خود کو پگھلتے دیکھنا