dukhoñ ke ruup bahut aur sukhoñ ke ḳhvāb bahut

tirā karam hai bahut par mire azaab bahut

dukhon ke rup bahut aur sukhon ke KHwab bahut

tera karam hai bahut par mere azab bahut

shahroñ ke saare jañgal gunjān ho ga.e haiñ

phir log mere andar sunsān ho ga.e haiñ

shahron ke sare jangal gunjaan ho gae hain

phir log mere andar sunsan ho gae hain

TuuTī hai ye kashtī to mire saath safar ko

vo jān-e-masāfat mirā tayyār huā hai

TuTi hai ye kashti to mere sath safar ko

wo jaan-e-masafat mera tayyar hua hai

duur tak ye rāste ḳhāmosh haiñ

duur tak ham ḳhud ko sunte jā.eñge

dur tak ye raste KHamosh hain

dur tak hum KHud ko sunte jaenge

is ḳhūbi-e-qismat pe mujhe naaz bahut hai

vo shaḳhs mirī jaañ kā talabgār huā hai

is KHubi-e-qismat pe mujhe naz bahut hai

wo shaKHs meri jaan ka talabgar hua hai

fareb-e-qurb-e-yār ho ki hasrat-e-supurdagī

kisī sabab se dil mujhe ye be-qarār chāhiye

fareb-e-qurb-e-yar ho ki hasrat-e-supurdagi

kisi sabab se dil mujhe ye be-qarar chahiye

mujhe aziiz hai be-ehtiyātī-e-sāda

na shauq hai na hunar us ko āzmāne kā

mujhe aziz hai be-ehtiyati-e-sada

na shauq hai na hunar us ko aazmane ka

ġham-e-zamāna jab na ho ġham-e-vajūd DhūñD luuñ

ki ik zamīn-e-jāñ jo hai vo dāġhdār chāhiye

gham-e-zamana jab na ho gham-e-wajud DhunD lun

ki ek zamin-e-jaan jo hai wo daghdar chahiye

lamha-e-imkān ko pahlū badalte dekhnā

ātish-e-be-rañg meñ ḳhud ko pighalte dekhnā

lamha-e-imkan ko pahlu badalte dekhna

aatish-e-be-rang mein KHud ko pighalte dekhna