ننھے خرگو ش کی چالاکی

پھر خرگوشوں کے سردار ڈِم ڈِم نے کھڑے ہوکر اپنی تقریر اس طرح شروع کی:

’’محترم بھائیو اور بہنو، آج میں نے آپ کو بہت بڑے ہنگامی حالات پرغوروخوض کرنے کے لئے بلایاہے۔ آپ لوگوں نے میری بات کو دھیان میں رکھتے ہوئے زیادہ سے زیادہ تعداد میں جمع ہو کر اس جلسے کو کامیاب بنایا ہے۔ اس کے لئے میں آپ سب کا شکرگزار ہوں۔ آپ نے یہاں آنے کے لئے جوتکلیفیں اٹھائی ہیں، اس کے لئے میں معافی چاہتاہوں‘‘۔

اتنا سننے کے بعد سب خرگوشوں نے سردار ڈِم ڈِم کی جے کے نعروں سے جنگل کو گنجا دیا۔ پھر سردار ڈم ڈم نے آگے تقریرشروع کی، ’’ہاں تو بھائیو، جس مشکل کو حل کرنے کے لئے آپ کو بلایا گیا ہے، وہ مشکل بادشاہ شیر کے نائب وزیر گیدڑ کی پیدا کی ہوئی ہے۔ جاسوسوں کے ذریعے مجھے پتہ چلا ہے کہ نائب وزیر نے کل وزیر خاص اُلّو سے دو گھنٹے تک بات چیت کی۔ جس میں گیدڑ نے شیر کے ذریعے ہم لوگوں کو کھانے کی بات رکھی۔ گیدڑ بادشاہ شیر سے کہے گا کہ ان کی صحت خراب ہوتی جارہی ہے، اس لئے انہیں روز ایک خرگوش کھانا چاہئے۔ پھر بادشاہ شیر ہر روز مجھ سے ایک خرگوش کھانے کے لئے منگائے گا۔

’’مجھے یہ بھی پتہ چلاہے کہ یہ بات نائب گیدڑ کل اپنے بادشاہ شیر سے کہے گا۔ امید ہے کہ بادشاہ شیر اپنے نائب وزیر کی اس تجویز کومان کر دو تین دن میں مجھے روزانہ ایک خرگوش بھیجنے کے لئے حکم دے گا۔ اب آپ ہی بتائیے کہ اس مسئلے کو کیسے حل کیا جائے؟ جہاں تک میرا خیال ہے، یہ نائب وزیر گیدڑ جب تک زندہ رہے گا، تب تک وہ ہم لوگوں کو  مرواتا رہے گا۔ اگر آپ لوگ اس گیدڑ کو کسی طرح کل تک مار ڈالنے کا طریقہ سوچ لیں تو ہم سب بچ سکتے ہیں۔ میں آپ کو دو گھنٹے کا وقت دیتا ہوں، ورنہ کل پھر اسی وقت ایک اور بیٹھک ہوگی۔‘‘ سردار ڈم ڈم نے اپنی تقریر ختم کی۔ سبھی خرگوش پریشان ہو کر سوچ  بچار کرنے لگے۔

قریب ایک گھنٹے بعد ایک چھوٹا خرگوش ہمت کرکے کھڑا ہوا اوربولا: ’’محترم ڈم ڈم صاحب، میرا نام پنٹی ہے۔  مجھے گیدڑ پکڑنے کا  بہت عمدہ طریقہ آتا ہے۔ اس کام کے لئے مجھے چار ساتھیوں کی ضرورت ہے‘‘۔

سردار ڈم ڈم نے پٹنی کو چار خرگوش ساتھی دے دیئے اور کہا، ’’مجھے امید ہے کہ آپ کل تک یہ مشکل کام کرنے میں کامیاب ہوجائیں گے۔ اب آپ سب بھائی اور بہنیں جاسکتے ہیں۔ جے ہند!‘‘

سب خرگو ش اپنے اپنے گھر چلے گئے۔ پنٹی نے اپنے چار ساتھیوں کو طریقہ بتا کر دوسرے دن مقررہ وقت پرایک درخت کے نیچے آنے کے لئے کہہ دیا۔ پھر وہ بھی اپنے گھر چلا گیا۔

دوسرے دن سب ساتھی تجویز کے مطابق ا س راستے پر پہنچے جہاں سے گیدڑ روز اپنے گھر جاتا تھا۔ اسی راستے میں پنٹی نے ایک درخت کا انتخاب کیا اوراس درخت سے ایک پتلی ٹہنی توڑی اور اسے درخت کے تنے سے کس کر باندھ دیا۔

اب شاخ درخت کے تنے سے بالکل چمٹ گئی تھی۔ اس کے بعد پنٹی نے ایک خرگوش کی پیٹھ پر چڑھ کر شاخ کے اوپری سرے پر ایک لمبی رسی باندھ  دی۔ اب ٹہنی اس طرح ہو گئی تھی کہ اگر رسی کھینچی جاتی تو شاخ  کھنچ کر ایک بڑے چمٹے کی طرح ہو جاتی اور درخت اور شاخ  کے درمیان ایک خلا بن جاتا۔ چھوڑ نے پر شاخ دوبارہ درخت سے لگ جاتی۔

پنٹی گیدڑ کے راستے میں کھڑا ہوگیا۔ باقی خرگوشوں نے مل کر رسی کھینچی جس سے بندھی ہوئی شاخ اور درخت کے تنے کے درمیان ایک بڑے چمٹے کی طرح خلا بن گیا۔

شام کو گیدڑ اسی راستے سے اپنے گھر کی طرف جارہا تھا۔ اس نے جب پنٹی کو راستے میں کھڑے دیکھا تو پھولے نے سمایا۔ اس کے منہ میں پانی بھر آیا۔ پنٹی بھی ہوشیار ہوگیا۔ گیدڑ جیسے ہی پنٹی کے قریب آیا، اس نے درخت کی طرف دوڑنا شروع کیا۔ گیدڑ بھی پنٹی کے پیچھے دوڑا۔

درخت کے پاس پہنچ کر پنٹی درخت اور شاخ کے درمیان سے نکل گیا۔ گیدڑ بھی جب درمیان سے نکلنے لگا تب چاروں خرگوش ساتھیوں نے فوراً رسی چھوڑ دی۔ رسّی کا چھوڑنا تھا کہ شاخ درخت سے لگ گئی اور گیدڑ کی دم اس میں پھنس کر رہ گئی۔ پھر سب خرگوشوں نے مل کر گیدڑ کی خوب مرمت کی اوراسے جان سے مار ڈالا۔

پنٹی کی اس تجویز سے خوش ہو  کر سارے خرگوشوں نے اسے بہت سا انعام دیا۔