گھٹتی بڑھتی روشنیوں نے مجھے سمجھا نہیں

میں کسی پتھر کسی دیوار کا سایا نہیں

جانے کن رشتوں نے مجھ کو باندھ رکھا ہے کہ میں

مدتوں سے آندھیوں کی زد میں ہوں بکھرا نہیں

دے نشانی کوئی ایسی کہ سدا یاد رہے

زخم کی بات ہے کیا زخم تو بھر جائیں گے

کرو گے یاد تو ہر بات یاد آئے گی

گزرتے وقت کی ہر موج ٹھہر جائے گی

بہت تھا خوف جس کا پھر وہی قصا نکل آیا

مرے دکھ سے کسی آواز کا رشتا نکل آیا

کہتے کہتے کچھ بدل دیتا ہے کیوں باتوں کا رخ

کیوں خود اپنے آپ کے بھی ساتھ وہ سچا نہیں

یہ اہتمام چراغاں بجا سہی لیکن

سحر تو ہو نہیں سکتی دیئے جلانے سے

پیار کے بندھن خون کے رشتے ٹوٹ گئے خوابوں کی طرح

جاگتی آنکھیں دیکھ رہی تھیں کیا کیا کاروبار ہوئے

کوئی یادوں سے جوڑ لے ہم کو

ہم بھی اک ٹوٹتا سا رشتہ ہیں

تجھ میں اور مجھ میں تعلق ہے وہی

ہے جو رشتہ ساز اور مضراب میں

تیز ہوائیں آنکھوں میں تو ریت دکھوں کی بھر ہی گئیں

جلتے لمحے رفتہ رفتہ دل کو بھی جھلسائیں گے

وہی ہے رنگ مگر بو ہے کچھ لہو جیسی

یہ اب کی فصل میں کھلتے گلاب کیسے ہیں