وعدہ معاوضے کا نہ کرتا اگر خدا

خیرات بھی سخی سے نہ ملتی فقیر کو

وطن کی ریت ذرا ایڑیاں رگڑنے دے

مجھے یقیں ہے کہ پانی یہیں سے نکلے گا

جبھی تو عمر سے اپنی زیادہ لگتا ہوں

بڑا ہے مجھ سے کئی سال تجربہ میرا

تو چلے ساتھ تو آہٹ بھی نہ آئے اپنی

درمیاں ہم بھی نہ ہوں یوں تجھے تنہا چاہیں

خود مری آنکھوں سے اوجھل میری ہستی ہو گئی

آئینہ تو صاف ہے تصویر دھندلی ہو گئی

ڈبونے والوں کو شرمندہ کر چکا ہوں گا

میں ڈوب کر ہی سہی پار اتر چکا ہوں گا

پہلے رگ رگ سے مری خون نچوڑا اس نے

اب یہ کہتا ہے کہ رنگت ہی مری پیلی ہے

میں اپنے گھر میں ہوں گھر سے گئے ہوؤں کی طرح

مرے ہی سامنے ہوتا ہے تذکرہ میرا

زخم تنہائی میں خوشبوئے حنا کس کی تھی

سایہ دیوار پہ میرا تھا صدا کس کی تھی

مانا کہ مشت خاک سے بڑھ کر نہیں ہوں میں

لیکن ہوا کے رحم و کرم پر نہیں ہوں میں

مجھے خود اپنی طلب کا نہیں ہے اندازہ

یہ کائنات بھی تھوڑی ہے میرے کاسے میں

زندگی تجھ سے ہر اک سانس پہ سمجھوتا کروں

شوق جینے کا ہے مجھ کو مگر اتنا بھی نہیں

سانس لیتا ہوں کہ پت جھڑ سی لگی ہے مجھ میں

وقت سے ٹوٹ رہے ہیں مرے بندھن جیسے

ہر شخص پر کیا نہ کرو اتنا اعتماد

ہر سایہ دار شے کو شجر مت کہا کرو

کچھ نہ کہنے سے بھی چھن جاتا ہے اعجاز سخن

ظلم سہنے سے بھی ظالم کی مدد ہوتی ہے

لیا جو اس کی نگاہوں نے جائزہ میرا

تو ٹوٹ ٹوٹ گیا خود سے رابطہ میرا