fasāne yuuñ to mohabbat ke sach haiñ par kuchh kuchh

baḌhā bhī dete haiñ ham zeb-e-dāstāñ ke liye

fasane yun to mohabbat ke sach hain par kuchh kuchh

baDha bhi dete hain hum zeb-e-dastan ke liye

be-uzr vo kar lete haiñ va.ada ye samajh kar

ye ahl-e-muravvat haiñ taqāzā na kareñge

be-uzr wo kar lete hain wada ye samajh kar

ye ahl-e-murawwat hain taqaza na karenge

āshufta-ḳhātirī vo balā hai ki 'sheftā'

taa.at meñ kuchh maza hai na lazzat gunāh meñ

aashufta-KHatiri wo bala hai ki 'shefta'

taat mein kuchh maza hai na lazzat gunah mein

kis liye lutf kī bāteñ haiñ phir

kyā koī aur sitam yaad aayā

kis liye lutf ki baaten hain phir

kya koi aur sitam yaad aaya

shab vasl kī bhī chain se kyūñkar basar kareñ

jab yuuñ nigāhbānī murġh-e-sahar kareñ

shab wasl ki bhi chain se kyunkar basar karen

jab yun nigahbani murgh-e-sahar karen