aaj viraniyon mein mera dil naya silsila chahta hai

aaj vīrāniyoñ meñ mirā dil nayā silsila chāhtā hai

shaam Dhalne ko hai zindagī kī ḳhudā aur kyā chāhtā hai

dhuup kī niyyatoñ meñ bhaḌakne lage nafratoñ ke alaav

ai ghaTā is liye tujh ko merā badan oḌhnā chāhtā hai

niiñd kī rāhatoñ se nahīñ mutma.in silsila dhaḌkanoñ kā

phir dil-e-zār ra.anā.iyoñ meñ guñdhā ratjagā chāhtā hai

terī nazdīkiyoñ ko pahan ke maiñ shahzāda lagne lagā huuñ

chhū ke rañgīniyāñ ab ke dekhūñ tirī jii, baḌā chāhtā hai

parvarish hausloñ kī tamām umr mere lahū ne ḳhamoshī se kī

ab junūñ aks ko dekhne ke liye ā.īna chāhtā hai

jo hathelī kī saarī purānī lakīroñ ko tabdīl kar de

aisā ḳhush-rañg har aadmī ab yahāñ sāneha chāhtā hai

tum samundar ke sahme hue josh ko merā paiġhām denā

mausam-e-habs meñ phir koī aaj taaza havā chāhtā hai

umr bhar āñsuoñ se jo dhotā rahā chehra mahrūmiyoñ kā

vo tirī rahmatoñ se mire maulā ab ke jazā chāhtā hai

naaz thā jis ko merī rifāqat ke har lamha-e-muḳhtasar par

aaj mahsūs aisā huā hai ki vo fāsla chāhtā hai

aaj viraniyon mein mera dil naya silsila chahta hai

sham Dhalne ko hai zindagi ki KHuda aur kya chahta hai

dhup ki niyyaton mein bhaDakne lage nafraton ke alaw

ai ghaTa is liye tujh ko mera badan oDhna chahta hai

nind ki rahaton se nahin mutmain silsila dhaDkanon ka

phir dil-e-zar ranaiyon mein gundha ratjaga chahta hai

teri nazdikiyon ko pahan ke main shahzada lagne laga hun

chhu ke ranginiyan ab ke dekhun teri ji, baDa chahta hai

parwarish hauslon ki tamam umr mere lahu ne KHamoshi se ki

ab junun aks ko dekhne ke liye aaina chahta hai

jo hatheli ki sari purani lakiron ko tabdil kar de

aisa KHush-rang har aadmi ab yahan saneha chahta hai

tum samundar ke sahme hue josh ko mera paigham dena

mausam-e-habs mein phir koi aaj taza hawa chahta hai

umr bhar aansuon se jo dhota raha chehra mahrumiyon ka

wo teri rahmaton se mere maula ab ke jaza chahta hai

naz tha jis ko meri rifaqat ke har lamha-e-muKHtasar par

aaj mahsus aisa hua hai ki wo fasla chahta hai