aankhon ko ab nigah ki aadat nahin rahi

āñkhoñ ko ab nigāh kī aadat nahīñ rahī

ab kuchh bhī dekhne kī zarūrat nahīñ rahī

sachchā.iyoñ kī raah bahut ho ga.ī kaThin

is rāste pe chalne kī himmat nahīñ rahī

dushman ho dost ho koī apnā ki ġhair ho

ham ko to ab kisī kī bhī hājat nahīñ rahī

duniyā azīz-tar rahī ik arsa-e-darāz

lekin ab is kī bhī to mohabbat nahīñ rahī

arsa huā kisī ne pukārā nahīñ mujhe

shāyad kisī ko merī zarūrat nahīñ rahī

kāñTā sā ek dil meñ khaTaktā hai mustaqil

par dil kī baat kahne kī aadat nahīñ rahī

sarmāya-e-hayāt huā chāhtā hai ḳhatm

jis par ġhurūr thā vahī daulat nahīñ rahī

'bushrā' kabhī jo jaao vahāñ arz-e-hāl ko

kahnā ki ham pe ab vo ināyat nahīñ rahī

aankhon ko ab nigah ki aadat nahin rahi

ab kuchh bhi dekhne ki zarurat nahin rahi

sachchaiyon ki rah bahut ho gai kaThin

is raste pe chalne ki himmat nahin rahi

dushman ho dost ho koi apna ki ghair ho

hum ko to ab kisi ki bhi hajat nahin rahi

duniya aziz-tar rahi ek arsa-e-daraaz

lekin ab is ki bhi to mohabbat nahin rahi

arsa hua kisi ne pukara nahin mujhe

shayad kisi ko meri zarurat nahin rahi

kanTa sa ek dil mein khaTakta hai mustaqil

par dil ki baat kahne ki aadat nahin rahi

sarmaya-e-hayat hua chahta hai KHatm

jis par ghurur tha wahi daulat nahin rahi

'bushra' kabhi jo jao wahan arz-e-haal ko

kahna ki hum pe ab wo inayat nahin rahi