ab to apne jism ka saya bhi begana hua

ab to apne jism kā saaya bhī begāna huā

maiñ tirī mahfil meñ aa kar aur bhī tanhā huā

vaqf-e-dard-e-jāñ huā mahv-e-ġham-e-duniyā huā

dil ajab shai hai kabhī qatra kabhī dariyā huā

terī aahaT ke ta.āqub meñ huuñ sadiyoñ se ravāñ

rāstoñ ke pech-o-ḳham meñ Thokareñ khātā huā

lazzat-e-dīdār kī ai sā.at-e-raḳhshāñ Thahar

paḌh rahā huuñ maiñ tire chehre pe kuchh likkhā huā

ab to tere husn kī har anjuman meñ dhuum hai

jis ne merā haal dekhā terā dīvāna huā

vo samay ruḳhsat hue hamdam vo shāmeñ kho ga.iiñ

kin ḳhayāloñ ke jhameloñ meñ hai tū uljhā huā

ab to apne jism ka saya bhi begana hua

main teri mahfil mein aa kar aur bhi tanha hua

waqf-e-dard-e-jaan hua mahw-e-gham-e-duniya hua

dil ajab shai hai kabhi qatra kabhi dariya hua

teri aahaT ke taaqub mein hun sadiyon se rawan

raston ke pech-o-KHam mein Thokaren khata hua

lazzat-e-didar ki ai saat-e-raKHshan Thahar

paDh raha hun main tere chehre pe kuchh likkha hua

ab to tere husn ki har anjuman mein dhum hai

jis ne mera haal dekha tera diwana hua

wo samay ruKHsat hue hamdam wo shamen kho gain

kin KHayalon ke jhamelon mein hai tu uljha hua