ab to har ek adakar se Dar lagta hai

ab to har ek adākār se Dar lagtā hai

mujh ko dushman se nahīñ yaar se Dar lagtā hai

kaise dushman ke muqābil vo Thahar pā.egā

jis ko TuuTī huī talvār se Dar lagtā hai

vo jo pāzeb kī jhankār kā shaidā.ī ho

us ko talvār kī jhankār se Dar lagtā hai

mujh ko bāloñ kī safedī ne ḳhabar-dār kiyā

zindagī ab tirī raftār se Dar lagtā hai

kar deñ maslūb unheñ laakh zamāne vaale

haq-parastoñ ko kahāñ daar se Dar lagtā hai

vo kisī tarah bhī tairāk nahīñ ho saktā

duur se hī jise mañjdhār se Dar lagtā hai

mere āñgan meñ hai vahshat kā baserā 'afzal'

mujh ko ghar ke dar-o-dīvār se Dar lagtā hai

ab to har ek adakar se Dar lagta hai

mujh ko dushman se nahin yar se Dar lagta hai

kaise dushman ke muqabil wo Thahar paega

jis ko TuTi hui talwar se Dar lagta hai

wo jo pazeb ki jhankar ka shaidai ho

us ko talwar ki jhankar se Dar lagta hai

mujh ko baalon ki safedi ne KHabar-dar kiya

zindagi ab teri raftar se Dar lagta hai

kar den maslub unhen lakh zamane wale

haq-paraston ko kahan dar se Dar lagta hai

wo kisi tarah bhi tairak nahin ho sakta

dur se hi jise manjdhaar se Dar lagta hai

mere aangan mein hai wahshat ka basera 'afzal'

mujh ko ghar ke dar-o-diwar se Dar lagta hai