abhi ashkon mein KHun shamil nahin hai

abhī ashkoñ meñ ḳhuuñ shāmil nahīñ hai

mohabbat kā junūñ kāmil nahīñ hai

zamāne se mohabbat kā abhī tak

ye hāsil hai ki kuchh hāsil nahīñ hai

na āñkheñ phoḌ is dasht-e-junūñ meñ

ye rāh-e-nāqa-e-mahmil nahīñ hai

zamīñ par baiTh jā ai shaiḳh tū bhī

ye bazm-e-mai tirī mahfil nahīñ hai

tabīboñ se kaho ghar lauT jaa.eñ

ye dard-e-dil vo dard-e-dil nahīñ hai

hamīñ 'aḳhlāq' us se be-ḳhabar haiñ

kisī pal ham se vo ġhāfil nahīñ hai

abhi ashkon mein KHun shamil nahin hai

mohabbat ka junun kaamil nahin hai

zamane se mohabbat ka abhi tak

ye hasil hai ki kuchh hasil nahin hai

na aankhen phoD is dasht-e-junun mein

ye rah-e-naqa-e-mahmil nahin hai

zamin par baiTh ja ai shaiKH tu bhi

ye bazm-e-mai teri mahfil nahin hai

tabibon se kaho ghar lauT jaen

ye dard-e-dil wo dard-e-dil nahin hai

hamin 'aKHlaq' us se be-KHabar hain

kisi pal hum se wo ghafil nahin hai