ai sanam wasl ki tadbiron se kya hota hai

ai sanam vasl kī tadbīroñ se kyā hotā hai

vahī hotā hai jo manzūr-e-ḳhudā hotā hai

nahīñ bachtā nahīñ bachtā nahīñ bachtā āshiq

pūchhte kyā ho shab-e-hijr meñ kyā hotā hai

be-asar naale nahīñ aap kā Dar hai mujh ko

abhī kah dījiye phir dekhiye kyā hotā hai

kyuuñ na tashbīh use zulf se deñ āshiq-e-zār

vāqa.ī tūl-e-shab-e-hijr balā hotā hai

yuuñ takabbur na karo ham bhī haiñ bande us ke

sajde but karte haiñ haamī jo ḳhudā hotā hai

'barq' uftāda vo huuñ saltanat-e-ālam meñ

tāj-e-sar ijz se naqsh-e-kaf-e-pā hotā hai

ai sanam wasl ki tadbiron se kya hota hai

wahi hota hai jo manzur-e-KHuda hota hai

nahin bachta nahin bachta nahin bachta aashiq

puchhte kya ho shab-e-hijr mein kya hota hai

be-asar nale nahin aap ka Dar hai mujh ko

abhi kah dijiye phir dekhiye kya hota hai

kyun na tashbih use zulf se den aashiq-e-zar

waqai tul-e-shab-e-hijr bala hota hai

yun takabbur na karo hum bhi hain bande us ke

sajde but karte hain hami jo KHuda hota hai

'barq' uftada wo hun saltanat-e-alam mein

taj-e-sar ijz se naqsh-e-kaf-e-pa hota hai