aisa kar sakte the kya koi guman tum aur main

aisā kar sakte the kyā koī gumāñ tum aur maiñ

aise tanhā nazar ā.eñge yahāñ tum aur maiñ

bazm ārāsta hogī to numāyāñ hoñge

kisī tanhā.ī meñ shāyad haiñ nihāñ tum aur maiñ

rahguzar ḳhatm huī jaatī hai aage jā kar

chhoḌ aa.e haiñ kahāñ apnā nishāñ tum aur maiñ

jhilmilātī hai kahīñ par kisī imkān kī lau

usī imkān kī jānib nigarāñ tum aur maiñ

be-hisī shart hī Thahrī thī rifāqat meñ agar

kis liye karte rahe jaañ kā ziyāñ tum aur meñ

ek inkār kī ḳhvāhish ko chhupā.e dil meñ

gird-e-iqrār meñ baiThe haiñ miyāñ tum aur maiñ

ab thakan jism meñ utrī hai to aatā hai ḳhayāl

kin havāoñ meñ rahe raqs-kunāñ tum aur maiñ

maiñ ne pūchhā ki koī dil-zadagāñ kī hai misāl

kis tavaqquf se kahā us ne ki haañ tum aur maiñ

kis kī āvāz ta.āqub meñ chalī aa.ī 'razī'

is se pahle bhī to aa.e the yahāñ tum aur maiñ

aisa kar sakte the kya koi guman tum aur main

aise tanha nazar aaenge yahan tum aur main

bazm aarasta hogi to numayan honge

kisi tanhai mein shayad hain nihan tum aur main

rahguzar KHatm hui jati hai aage ja kar

chhoD aae hain kahan apna nishan tum aur main

jhilmilati hai kahin par kisi imkan ki lau

usi imkan ki jaanib nigaran tum aur main

be-hisi shart hi Thahri thi rifaqat mein agar

kis liye karte rahe jaan ka ziyan tum aur mein

ek inkar ki KHwahish ko chhupae dil mein

gird-e-iqrar mein baiThe hain miyan tum aur main

ab thakan jism mein utri hai to aata hai KHayal

kin hawaon mein rahe raqs-kunan tum aur main

main ne puchha ki koi dil-zadagan ki hai misal

kis tawaqquf se kaha us ne ki han tum aur main

kis ki aawaz taaqub mein chali aai 'razi'

is se pahle bhi to aae the yahan tum aur main