apni haalat pe aansu bahane lage

apnī hālat pe aañsū bahāne lage

sard rātoñ meñ ḳhud ko jagāne lage

surḳh tāroñ ke hamrāh kar ke safar

ḳhvāb-zāroñ se kyuuñ aage jaane lage

duur bajne lagī hai kahīñ bāñsurī

ham bhī zindān meñ giit gaane lage

jo basārat basīrat se mahrūm haiñ

shahr ke ā.inoñ ko sajāne lage

ham ne jab hāl-e-dil un se apnā kahā

vo bhī qissa kisī kā sunāne lage

nīstī kā sitam koī kam thā jo tum

apnī hastī kā dukh bhī manāne lage

jab bujhī merī āñkhoñ kī lau 'āsima'

tiira manzar bhī jalva dikhāne lage

apni haalat pe aansu bahane lage

sard raaton mein KHud ko jagane lage

surKH taron ke hamrah kar ke safar

KHwab-zaron se kyun aage jaane lage

dur bajne lagi hai kahin bansuri

hum bhi zindan mein git gane lage

jo basarat basirat se mahrum hain

shahr ke aainon ko sajaane lage

hum ne jab haal-e-dil un se apna kaha

wo bhi qissa kisi ka sunane lage

nisti ka sitam koi kam tha jo tum

apni hasti ka dukh bhi manane lage

jab bujhi meri aankhon ki lau 'asima'

tera manzar bhi jalwa dikhane lage