ashkon se ba-rang-e-ab humne

ashkoñ se ba-rañg-e-āb ham ne

dariyā ko likhā sarāb ham ne

ham ḳhud se savāl kar rahe the

lo DhūñD liyā javāb ham ne

dekhā nahīñ us ko kitne din se

uñglī pe kiyā hisāb ham ne

ab apnī nigāh darmiyāñ hai

dekhā tujhe be-naqāb ham ne

kyā kyā na hamāre jī meñ aa.ī

kuchh tum ko diyā javāb ham ne

jugnū bhī na de sake na de vo

māñgā nahīñ āftāb ham ne

ik ġham hai use bhī bhuul jaa.eñ

pī rakkhī hai kyā sharāb ham ne

aise ki suno to hañs paḌo tum

dekhe haiñ ajiib ḳhvāb ham ne

ashkon se ba-rang-e-ab hum ne

dariya ko likha sarab hum ne

hum KHud se sawal kar rahe the

lo DhunD liya jawab hum ne

dekha nahin us ko kitne din se

ungli pe kiya hisab hum ne

ab apni nigah darmiyan hai

dekha tujhe be-naqab hum ne

kya kya na hamare ji mein aai

kuchh tum ko diya jawab hum ne

jugnu bhi na de sake na de wo

manga nahin aaftab hum ne

ek gham hai use bhi bhul jaen

pi rakkhi hai kya sharab hum ne

aise ki suno to hans paDo tum

dekhe hain ajib KHwab hum ne