baat ye hai ki koi baat purani bhi nahin

baat ye hai ki koī baat purānī bhī nahīñ

aur is ḳhaak meñ ab koī nishānī bhī nahīñ

ye to zāhir meñ tamavvuj thā balā kā lekin

ye badan merā jahāñ koī ravānī bhī nahīñ

yā to ik mauj-e-balā-ḳhez hai merī ḳhātir

yā ki mashkīza-e-jāñ meñ kahīñ paanī bhī nahīñ

baat ye hai ki sabhī bhaa.ī mire dushman haiñ

mas.ala ye hai ki maiñ yūsuf-e-sānī bhī nahīñ

sach to ye hai ki mire paas hī dirham kam haiñ

varna is shahr meñ is darja girānī bhī nahīñ

saare kirdār haiñ añgusht-ba-dandāñ mujh meñ

ab to kahne ko mire paas kahānī bhī nahīñ

ek benām-o-nasab sach mirā iz.hār huā

varna alfāz meñ vo sail-e-ma.ānī bhī nahīñ

baat ye hai ki koi baat purani bhi nahin

aur is KHak mein ab koi nishani bhi nahin

ye to zahir mein tamawwuj tha bala ka lekin

ye badan mera jahan koi rawani bhi nahin

ya to ek mauj-e-bala-KHez hai meri KHatir

ya ki mashkiza-e-jaan mein kahin pani bhi nahin

baat ye hai ki sabhi bhai mere dushman hain

masala ye hai ki main yusuf-e-sani bhi nahin

sach to ye hai ki mere pas hi dirham kam hain

warna is shahr mein is darja girani bhi nahin

sare kirdar hain angusht-ba-dandan mujh mein

ab to kahne ko mere pas kahani bhi nahin

ek benam-o-nasab sach mera izhaar hua

warna alfaz mein wo sail-e-maani bhi nahin