bad-qismati ko ye bhi gawara na ho saka

bad-qismatī ko ye bhī gavārā na ho sakā

ham jis pe mar miTe vo hamārā na ho sakā

rah to ga.ī fareb-e-masīhā kī aabrū

har chand ġham ke māroñ kā chāra na ho sakā

ḳhush huuñ ki baat shorish-e-tūfāñ kī rah ga.ī

achchhā huā nasīb kinārā na ho sakā

be-chārgī pe chāragarī kī haiñ tohmateñ

achchhā kisī se ishq kā maarā na ho sakā

kuchh ishq aisī baḳhsh gayā be-niyāziyāñ

dil ko kisī kā lutf gavārā na ho sakā

fart-e-ḳhushī meñ aañkh se aañsū nikal paḌe

jab un kā iltifāt gavārā na ho sakā

ulTī to thī naqāb kisī ne magar 'shakeb'

da.avoñ ke bāvajūd nazāra na ho sakā

bad-qismati ko ye bhi gawara na ho saka

hum jis pe mar miTe wo hamara na ho saka

rah to gai fareb-e-masiha ki aabru

har chand gham ke maron ka chaara na ho saka

KHush hun ki baat shorish-e-tufan ki rah gai

achchha hua nasib kinara na ho saka

be-chaargi pe chaaragari ki hain tohmaten

achchha kisi se ishq ka mara na ho saka

kuchh ishq aisi baKHsh gaya be-niyaziyan

dil ko kisi ka lutf gawara na ho saka

fart-e-KHushi mein aankh se aansu nikal paDe

jab un ka iltifat gawara na ho saka

ulTi to thi naqab kisi ne magar 'shakeb'

dawon ke bawajud nazara na ho saka