bahut tha naz jin par hum unhin rishton pe hanste hain

bahut thā naaz jin par ham unhīñ rishtoñ pe hañste haiñ

hamīñ kyā rasm-e-duniyā hai ki sab apnoñ pe hañste haiñ

ham aise log dīvāroñ pe hañsne ke nahīñ qaa.il

magar jab jī meñ aatā hai to darvāzoñ pe hañste haiñ

divāna kar gayā āḳhir hameñ farzāna-pan apnā

ki jin logoñ ko ronā thā ham un logoñ pe hañste haiñ

ab is ko zindagī kahiye ki ahd-e-be-hisī kahiye

gharoñ meñ log rote haiñ magar rastoñ pe hañste haiñ

yahāñ apnā parāyā kuchh nahīñ ḳhushbū pe mat jaao

galoñ meñ paḌne vaale phuul guldastoñ pe hañste haiñ

samajhne vaale kyā kyā kuchh samajhte haiñ 'sharar'-sāhab

rag-e-ma.anī phaḌaktī hai to ham lafzoñ pe hañste haiñ

bahut tha naz jin par hum unhin rishton pe hanste hain

hamin kya rasm-e-duniya hai ki sab apnon pe hanste hain

hum aise log diwaron pe hansne ke nahin qail

magar jab ji mein aata hai to darwazon pe hanste hain

diwana kar gaya aaKHir hamein farzana-pan apna

ki jin logon ko rona tha hum un logon pe hanste hain

ab is ko zindagi kahiye ki ahd-e-be-hisi kahiye

gharon mein log rote hain magar raston pe hanste hain

yahan apna paraya kuchh nahin KHushbu pe mat jao

galon mein paDne wale phul guldaston pe hanste hain

samajhne wale kya kya kuchh samajhte hain 'sharar'-sahab

rag-e-mani phaDakti hai to hum lafzon pe hanste hain