baKHshe phir us nigah ne arman nae nae

baḳhshe phir us nigāh ne armāñ na.e na.e

mahsūs ho rahe haiñ dil o jaañ na.e na.e

yuuñ qaid-e-zindagī ne rakhā muztarib hameñ

jaise hue hoñ dāḳhil-e-zindāñ na.e na.e

kis kis se is amānat-e-dīñ ko bachā.iye

milte haiñ roz dushman-e-īmāñ na.e na.e

rāhat kī justujū meñ ḳhushī kī talāsh meñ

ġham pāltī hai umr-e-gurezāñ na.e na.e

masjid meñ aur zikr butoñ kā janāb-e-shaiḳh

shāyad hue haiñ aap musalmāñ na.e na.e

dam bhar dam-e-ajal ko na hāsil huā farāġh

hote rahe charāġh farozāñ na.e na.e

ḳhāna-ḳharāb ham se jahāñ meñ kahāñ 'adīb'

ābād kar rahe haiñ bayābāñ na.e na.e

baKHshe phir us nigah ne arman nae nae

mahsus ho rahe hain dil o jaan nae nae

yun qaid-e-zindagi ne rakha muztarib hamein

jaise hue hon daKHil-e-zindan nae nae

kis kis se is amanat-e-din ko bachaiye

milte hain roz dushman-e-iman nae nae

rahat ki justuju mein KHushi ki talash mein

gham palti hai umr-e-gurezan nae nae

masjid mein aur zikr buton ka janab-e-shaiKH

shayad hue hain aap musalman nae nae

dam bhar dam-e-ajal ko na hasil hua faragh

hote rahe charagh farozan nae nae

KHana-KHarab hum se jahan mein kahan 'adib'

aabaad kar rahe hain bayaban nae nae