banae sab ne isi KHak se diye apne

banā.e sab ne isī ḳhaak se diye apne

falak se TuuT ke shams-o-qamar nahīñ aa.e

galī galī ho jahāñ jannatoñ kā gahvāra

hamārī raah meñ aise nagar nahīñ aa.e

har ek moḌ se pūchhā hai manziloñ kā pata

safar tamām huā rahbar nahīñ aa.e

ġhamoñ ke bojh se TuuTī hai zindagī kī kamar

badan pe zaḳhm kaheñ chāra-gar nahīñ aa.e

guloñ kī aañch ne jhulsā diyā bahāroñ ko

chaman ko lūTne barq-o-sharar nahīñ aa.e

hue haiñ sīna-e-shab meñ jo dafn afsāne

lab-e-sahar pe kabhī bhuul kar nahīñ aa.e

chamak uThe haiñ thapeḌoñ kī choT se qatre

sadaf kī god meñ 'anjum' guhar nahīñ aa.e

banae sab ne isi KHak se diye apne

falak se TuT ke shams-o-qamar nahin aae

gali gali ho jahan jannaton ka gahwara

hamari rah mein aise nagar nahin aae

har ek moD se puchha hai manzilon ka pata

safar tamam hua rahbar nahin aae

ghamon ke bojh se TuTi hai zindagi ki kamar

badan pe zaKHm kahen chaara-gar nahin aae

gulon ki aanch ne jhulsa diya bahaaron ko

chaman ko luTne barq-o-sharar nahin aae

hue hain sina-e-shab mein jo dafn afsane

lab-e-sahar pe kabhi bhul kar nahin aae

chamak uThe hain thapeDon ki choT se qatre

sadaf ki god mein 'anjum' guhar nahin aae