band kar le khiDkiyan yun raat ko bahar na dekh

band kar le khiḌkiyāñ yuuñ raat ko bāhar na dekh

Dūbtī āñkhoñ se apne shahr kā manzar na dekh

kyā pata zanjīr meñ Dhal jaa.e bistar kī shikan

ye safar kā vaqt hai ab jānib-e-bistar na dekh

ḳhaak o ḳhuuñ mīrās terī ḳhaak o ḳhuuñ terā nasīb

is ziyāñ-ḳhāne meñ apne paañv kā chakkar na dekh

tū ne jo parchhā.iyāñ chhoḌīñ vo sahrā ban ga.iiñ

ai nigār-e-vaqt ab pīchhe kabhī muḌ kar na dekh

band kar le khiDkiyan yun raat ko bahar na dekh

Dubti aankhon se apne shahr ka manzar na dekh

kya pata zanjir mein Dhal jae bistar ki shikan

ye safar ka waqt hai ab jaanib-e-bistar na dekh

KHak o KHun miras teri KHak o KHun tera nasib

is ziyan-KHane mein apne panw ka chakkar na dekh

tu ne jo parchhaiyan chhoDin wo sahra ban gain

ai nigar-e-waqt ab pichhe kabhi muD kar na dekh