be-hisi insan ka hasil na ho

be-hisī insān kā hāsil na ho

dostī ho ret kā sāhil na ho

maiñ to bas ye chāhtā huuñ vasl bhī

do diloñ ke darmiyāñ haa.el na ho

mujh ko tanhā chhoḌne vaale batā

kyā karūñ jab dil tirī mahfil na ho

kis tarah merī zabāñ tak aa.egā

harf jo sachchā.ī kā hāmil na ho

ye zamāna chāhtā hai aaj bhī

ḳhūn-e-dil tahrīr meñ shāmil na ho

jis taraf le jā rahī hai zindagī

us taraf bhī kūcha-e-qātil na ho

ādamiyyat ke liye ye shart hai

aadmī kuchh ho magar saa.il na ho

be-hisi insan ka hasil na ho

dosti ho ret ka sahil na ho

main to bas ye chahta hun wasl bhi

do dilon ke darmiyan hael na ho

mujh ko tanha chhoDne wale bata

kya karun jab dil teri mahfil na ho

kis tarah meri zaban tak aaega

harf jo sachchai ka hamil na ho

ye zamana chahta hai aaj bhi

KHun-e-dil tahrir mein shamil na ho

jis taraf le ja rahi hai zindagi

us taraf bhi kucha-e-qatil na ho

aadamiyyat ke liye ye shart hai

aadmi kuchh ho magar sail na ho