bhaTak rahe hain gham-e-agahi ke mare hue

bhaTak rahe haiñ ġham-e-āgahī ke maare hue

ham apnī zaat ko pātāl meñ utāre hue

sadā-e-sūr-e-sarāfīl kī rasan-basta

palaT ke jā.eñge ik roz ham pukāre hue

shikast-e-zāt shikast-e-hayāt bhī hogī

ki jī na pā.eñge ham hausloñ ko haare hue

ai mere ā.īna-rū ab kahīñ dikhā.ī de

ik umr biit ga.ī ḳhāl-o-ḳhad sañvāre hue

matā-e-jāñ haiñ mirī umr bhar kā hāsil haiñ

vo chand lamhe tire qurb meñ guzāre hue

zamīñ pe zarra-e-be-nām the magar 'shahbāz'

bulandiyoñ pe pahuñch kar hamīñ sitāre hue

bhaTak rahe hain gham-e-agahi ke mare hue

hum apni zat ko patal mein utare hue

sada-e-sur-e-sarafil ki rasan-basta

palaT ke jaenge ek roz hum pukare hue

shikast-e-zat shikast-e-hayat bhi hogi

ki ji na paenge hum hauslon ko haare hue

ai mere aaina-ru ab kahin dikhai de

ek umr bit gai KHal-o-KHad sanware hue

mata-e-jaan hain meri umr bhar ka hasil hain

wo chand lamhe tere qurb mein guzare hue

zamin pe zarra-e-be-nam the magar 'shahbaz'

bulandiyon pe pahunch kar hamin sitare hue