bina roe guzarna us gali se

binā ro.e guzarnā us galī se

lagā aisā ga.e ham zindagī se

jiyā huuñ umr bhar maiñ bhī akelā

use bhī kyā milā nārāzgī se

huuñ jiskā muntazir agle janam tak

milī to kyā kahūñgā us parī se

lahū meñ roz apne hī nahānā

maiñ aajiz aa gayā huuñ shā.erī se

jhalak ik maut kī dekhe to mānūñ

jise Dar lag rahā hai zindagī se

koī phir se dilā.e ek jīvan

thakan hotī nahīñ āvārgī se

ka.ī jazboñ kā ghar thā jaise maiñ bhī

mirī parteñ khulīñ dīvāngī se

ka.ī chehre dikhe par ba.ad un ke

mohabbat ho ga.ī be-chehragī se

kisī sūrat alag hone na paa.ī

tirī tasvīr merī shā.erī se

khaḌā jab se huuñ maiñ apne muqābil

ulajhtā hī nahīñ huuñ maiñ kisī se

tirī yādeñ haiñ yā sūraj hai koī

ye āñkheñ bujh rahī haiñ raushnī se

umīdeñ thī hameñ bhī chāñd se par

mohabbat hai use ab tīrgī se

zarūrat kyā hai man meñ jhāñkne kī

karo, gar baat kar paao nadī se

mire aañsū jo tum jharne se bah jaao

samundar tak pahuñch jā.ūñ isī se

bina roe guzarna us gali se

laga aisa gae hum zindagi se

jiya hun umr bhar main bhi akela

use bhi kya mila naraazgi se

hun jiska muntazir agle janam tak

mili to kya kahunga us pari se

lahu mein roz apne hi nahana

main aajiz aa gaya hun shaeri se

jhalak ek maut ki dekhe to manun

jise Dar lag raha hai zindagi se

koi phir se dilae ek jiwan

thakan hoti nahin aawargi se

kai jazbon ka ghar tha jaise main bhi

meri parten khulin diwangi se

kai chehre dikhe par baad un ke

mohabbat ho gai be-chehragi se

kisi surat alag hone na pai

teri taswir meri shaeri se

khaDa jab se hun main apne muqabil

ulajhta hi nahin hun main kisi se

teri yaaden hain ya suraj hai koi

ye aankhen bujh rahi hain raushni se

umiden thi hamein bhi chand se par

mohabbat hai use ab tirgi se

zarurat kya hai man mein jhankne ki

karo, gar baat kar pao nadi se

mere aansu jo tum jharne se bah jao

samundar tak pahunch jaun isi se