bujhti hui aankhon ki umidon ka diya hun

bujhtī huī āñkhoñ kī umīdoñ kā diyā huuñ

maiñ tez havāoñ kī hathelī pe rakhā huuñ

maiñ apnī hī āvāz kī pahchān meñ gum huuñ

tanhā.ī ke sahrā meñ daraḳhtoñ kī sadā huuñ

maiñ roz nikal paḌtā huuñ anjāne safar par

manzil ke qarīb aa ke bhī manzil se judā huuñ

har sub.h na.e karb ke chehroñ se mulāqāt

har shaam bichhaḌne kā sabab pūchh rahā huuñ

ye ḳhuun meñ Duube hue mā'sūm farishte

ḳhāmosh larazte hue hoñToñ kī du'ā huuñ

is darja huuñ sahmā huā sūraj kī tapish se

girtī huī dīvār ke saa.e meñ khaḌā huuñ

ai ḳhāk-e-vatan ab to vafāoñ kā silā de

maiñ TūTtī sāñsoñ kī fasīloñ pe khaḌā huuñ

palkoñ pe sajā.e hue sachchā.ī kī sham.eñ

nā-karda gunāhoñ kī sazā kaaT rahā huuñ

dastār salāmat na ridā.eñ na qabā.eñ

har lamha sulagte hue ḳhvāboñ kī chitā huuñ

bujhti hui aankhon ki umidon ka diya hun

main tez hawaon ki hatheli pe rakha hun

main apni hi aawaz ki pahchan mein gum hun

tanhai ke sahra mein daraKHton ki sada hun

main roz nikal paDta hun anjaane safar par

manzil ke qarib aa ke bhi manzil se juda hun

har subh nae karb ke chehron se mulaqat

har sham bichhaDne ka sabab puchh raha hun

ye KHun mein Dube hue ma'sum farishte

KHamosh larazte hue honTon ki du'a hun

is darja hun sahma hua suraj ki tapish se

girti hui diwar ke sae mein khaDa hun

ai KHak-e-watan ab to wafaon ka sila de

main TuTti sanson ki fasilon pe khaDa hun

palkon pe sajae hue sachchai ki shamen

na-karda gunahon ki saza kaT raha hun

dastar salamat na ridaen na qabaen

har lamha sulagte hue KHwabon ki chita hun