chalte chalte rahon se kaT jaana paDta hai

chalte chalte rāhoñ se kaT jaanā paḌtā hai

hote hote manzar se haT jaanā paḌtā hai

dekhnā paḌ jaatā hai ḳhud ko kar ke ek tamāshā.ī

apnī dhuul uḌā kar ḳhud aT jaanā paḌtā hai

ḳhattātī se duur bhaTakne vaale soch ke dāman ko

kore kāġhaz ke hāthoñ phaT jaanā paḌtā hai

sāzīna jab qadam baḌhātā hai us kī pāzeboñ kā

kānoñ ko jhankār kī aahaT jaanā paḌtā hai

ḳhvāhish mar jaa.e to us kī chitā ko aag dikhāne meñ

dhaḌkan dhaḌkan dil ke marghaT jaanā paḌtā hai

taab nahīñ ho jis meñ kāñch ko reza reza karne kī

us patthar ko TukḌoñ meñ baT jaanā paḌtā hai

ḳhud ke mutlāshī ko ek na ik din āḳhir-kār apne

bhūle-bisre hue kī chaukhaT jaanā paḌtā hai

sachchā.ī vo jang hai jis meñ ba.az auqāt sipāhī ko

aap muqābil apne hī DaT jaanā paḌtā hai

ik chingārī aag lagā jaatī hai ban meñ aur kabhī

ek kiran se zulmat ko chhaT jaanā paḌtā hai

baat riyā-kārī ke bin ban paatī nahīñ hai 'ḳhāvar'

is dozaḳh meñ karvaT karvaT jaanā paḌtā hai

chalte chalte rahon se kaT jaana paDta hai

hote hote manzar se haT jaana paDta hai

dekhna paD jata hai KHud ko kar ke ek tamashai

apni dhul uDa kar KHud aT jaana paDta hai

KHattati se dur bhaTakne wale soch ke daman ko

kore kaghaz ke hathon phaT jaana paDta hai

sazina jab qadam baDhata hai us ki pazebon ka

kanon ko jhankar ki aahaT jaana paDta hai

KHwahish mar jae to us ki chita ko aag dikhane mein

dhaDkan dhaDkan dil ke marghaT jaana paDta hai

tab nahin ho jis mein kanch ko reza reza karne ki

us patthar ko TukDon mein baT jaana paDta hai

KHud ke mutlashi ko ek na ek din aaKHir-kar apne

bhule-bisre hue ki chaukhaT jaana paDta hai

sachchai wo jang hai jis mein baz auqat sipahi ko

aap muqabil apne hi DaT jaana paDta hai

ek chingari aag laga jati hai ban mein aur kabhi

ek kiran se zulmat ko chhaT jaana paDta hai

baat riya-kari ke bin ban pati nahin hai 'KHawar'

is dozaKH mein karwaT karwaT jaana paDta hai