charagh ho gaya bad-nam kuchh ziyaada hi

charāġh ho gayā bad-nām kuchh ziyāda hī

ki jal rahā thā sar-e-bām kuchh ziyāda hī

tire bhulāne meñ merā qusūr itnā hai

ki paḌ ga.e the mujhe kaam kuchh ziyāda hī

maiñ kitne haath se guzrā yahāñ tak aate hue

mujhe kiyā gayā nīlām kuchh ziyāda hī

malāl terī judā.ī kā be-panah lekin

fasurda hai ye mirī shaam kuchh ziyāda hī

tamām umr kī āvārgī bajā lekin

lagā hai ishq kā ilzām kuchh ziyāda hī

bas ek raat se kaise thakan utartī hai

badan ko chāhiye ārām kuchh ziyāda hī

sambhāl apnī bahaktī huī zabāñ 'mansūr'

tū le rahā hai koī naam kuchh ziyāda hī

charagh ho gaya bad-nam kuchh ziyaada hi

ki jal raha tha sar-e-baam kuchh ziyaada hi

tere bhulane mein mera qusur itna hai

ki paD gae the mujhe kaam kuchh ziyaada hi

main kitne hath se guzra yahan tak aate hue

mujhe kiya gaya nilam kuchh ziyaada hi

malal teri judai ka be-panah lekin

fasurda hai ye meri sham kuchh ziyaada hi

tamam umr ki aawargi baja lekin

laga hai ishq ka ilzam kuchh ziyaada hi

bas ek raat se kaise thakan utarti hai

badan ko chahiye aaram kuchh ziyaada hi

sambhaal apni bahakti hui zaban 'mansur'

tu le raha hai koi nam kuchh ziyaada hi