chhupa rakkha tha yun KHud ko kamal mera tha

chhupā rakkhā thā yuuñ ḳhud ko kamāl merā thā

kisī pe khul nahīñ paayā jo haal merā thā

har ek pā-e-shikasta meñ thī mirī zanjīr

har ek dast-e-talab meñ savāl merā thā

maiñ reza reza bikhartā chalā gayā ḳhud hī

ki apne aap se bachnā muhāl merā thā

har ek samt se sañg-e-sadā kī bārish thī

maiñ chup rahā ki yahī kuchh ma.aal merā thā

tirā ḳhayāl thā taaza havā ke jhoñke meñ

jo gard uḌ ke ga.ī hai malāl merā thā

maiñ ro paḌā huuñ 'tabassum' siyāh rātoñ meñ

ġhurūb-e-māh meñ shāyad zavāl merā thā

chhupa rakkha tha yun KHud ko kamal mera tha

kisi pe khul nahin paya jo haal mera tha

har ek pa-e-shikasta mein thi meri zanjir

har ek dast-e-talab mein sawal mera tha

main reza reza bikharta chala gaya KHud hi

ki apne aap se bachna muhaal mera tha

har ek samt se sang-e-sada ki barish thi

main chup raha ki yahi kuchh maal mera tha

tera KHayal tha taza hawa ke jhonke mein

jo gard uD ke gai hai malal mera tha

main ro paDa hun 'tabassum' siyah raaton mein

ghurub-e-mah mein shayad zawal mera tha