dad-o-dahish ka aap ki KHugar nahin hun main

dād-o-dahish kā aap kī ḳhūgar nahīñ huuñ maiñ

be-sāḳhta suḳhan huuñ muqarrar nahīñ huuñ maiñ

tārīf tere husn kī aatī hai ġhaib se

mere qalam ke saath to yaksar nahīñ huuñ maiñ

masrūfiyat kā mujh pe yuuñ hamla huā ki ab

ḳhud apne aap ko bhī mayassar nahīñ huuñ maiñ

bande tū andhī duniyā meñ hai kis ko DhūñDhtā

andar se mujh ko DhūñD ki bāhar nahīñ huuñ maiñ

tū bhī kabhī vahāñ se mirā hāl-chāl pūchh

har baar tere baap kā naukar nahīñ huuñ maiñ

sote haiñ ek saath hī maiñ aur iztirāb

aa.egī niiñd jis meñ vo bistar nahīñ huuñ maiñ

tū sar se le ke paañv tā puurī ġhazal hai aur

tere radīf ke bhī barābar nahīñ huuñ maiñ

dad-o-dahish ka aap ki KHugar nahin hun main

be-saKHta suKHan hun muqarrar nahin hun main

tarif tere husn ki aati hai ghaib se

mere qalam ke sath to yaksar nahin hun main

masrufiyat ka mujh pe yun hamla hua ki ab

KHud apne aap ko bhi mayassar nahin hun main

bande tu andhi duniya mein hai kis ko DhunDhta

andar se mujh ko DhunD ki bahar nahin hun main

tu bhi kabhi wahan se mera haal-chaal puchh

har bar tere bap ka naukar nahin hun main

sote hain ek sath hi main aur iztirab

aaegi nind jis mein wo bistar nahin hun main

tu sar se le ke panw ta puri ghazal hai aur

tere radif ke bhi barabar nahin hun main