dard is darja mile zabt mein kaamil hua main

dard is darja mile zabt meñ kāmil huā maiñ

us ko paane kī talab meñ kisī qābil huā maiñ

phone par baat huī us se to andāza huā

apnī āvāz meñ bas aaj hī shāmil huā maiñ

ro ke aksar maiñ hañsā hañs ke maiñ royā bhī agar

zindagī tujh meñ to har rañg meñ shāmil huā maiñ

zindagī chain kī sab ko hī bhalī lagtī hai

kaise hālāt the mere ki jo qātil huā maiñ

dekhnā chāhūñgā maiñ tujh ko qarīb aur is se

aaj ke ba.ad kabhī ḳhud ko jo hāsil huā maiñ

koī samjhe yā na samjhe inheñ paḌhne vaalā

sher kah kar ye kaThin ḳhud pe hī maa.il huā maiñ

dard is darja mile zabt mein kaamil hua main

us ko pane ki talab mein kisi qabil hua main

phone par baat hui us se to andaza hua

apni aawaz mein bas aaj hi shamil hua main

ro ke aksar main hansa hans ke main roya bhi agar

zindagi tujh mein to har rang mein shamil hua main

zindagi chain ki sab ko hi bhali lagti hai

kaise haalat the mere ki jo qatil hua main

dekhna chahunga main tujh ko qarib aur is se

aaj ke baad kabhi KHud ko jo hasil hua main

koi samjhe ya na samjhe inhen paDhne wala

sher kah kar ye kaThin KHud pe hi mail hua main