dasht-e-bala-e-shauq mein KHeme lagae hain

dasht-e-balā-e-shauq meñ ḳheme lagā.e haiñ

ibn-e-ziyād-e-vaqt se kah do ham aa.e haiñ

ik kahkashāñ hī tanhā nahīñ vaj.h-e-dil-kashī

āñchal pe tere ham ne bhī motī luTā.e haiñ

tah kar chuke bisāt-e-ġham-o-fikr-e-rozgār

tab ḳhānqāh-e-ishq-o-mohabbat meñ aa.e haiñ

tum hī nahīñ ilāj-e-mohabbat se be-niyāz

ham ne bhī ehtiyāt ke purze uḌaa.e haiñ

lagtā yahī hai nuur ke rath par savār huuñ

āñkhoñ ne terī mujh ko vo raste sujhā.e haiñ

vahshat-sarā-e-dahr meñ bhī shād-kām haiñ

'sāqib' ye log kaun se jañgal se aa.e haiñ

dasht-e-bala-e-shauq mein KHeme lagae hain

ibn-e-ziyaad-e-waqt se kah do hum aae hain

ek kahkashan hi tanha nahin wajh-e-dil-kashi

aanchal pe tere hum ne bhi moti luTae hain

tah kar chuke bisat-e-gham-o-fikr-e-rozgar

tab KHanqah-e-ishq-o-mohabbat mein aae hain

tum hi nahin ilaj-e-mohabbat se be-niyaz

hum ne bhi ehtiyat ke purze uDae hain

lagta yahi hai nur ke rath par sawar hun

aankhon ne teri mujh ko wo raste sujhae hain

wahshat-sara-e-dahr mein bhi shad-kaam hain

'saqib' ye log kaun se jangal se aae hain